Тәуелсіздік күні қарсаңында Алматы облысының тұрғындарына мемлекеттік наградалар тапсырылды
Бүгін Алматы облысының әкімі Амандық Баталов Қазақстан Республикасының Тәуелсіздік күніне арналып Талдықорған қаласындағы «Жастар» Спорт сарайында өткен салтанатты жиында 65 адамға мемлекеттік награда және 7 адамға «Алматы облысының Құрметті азаматы» атағын тапсырды. Мемлекеттік марапатқа ие болғандар қатарында «Қазақстанның Еңбек Ері» атанған аңызға айналған спортшы, танымал меценат әрі бизнесмен Жақсылық Үшкемпіров, «Алматы облысының Құрметті азаматы» атағын алған космонавт, Халық қаһарманы Айдын Айымбетов те бар, – деп хабарлайды Алматы облысы әкімінің баспасөз қызметі.
Мерекелік жиында құттықтау сөз сөйлеген облыс әкімі Амандық Баталов:
– Құрметті жиынға қатысушылар! Осыдан 26 жыл бұрын Мемлекет басшысы Нұрсұлтан Әбішұлы Назарбаев: «Тәуелсіздіктің біздің бәрімізге артар міндеті мол. Қазақстанның көп ұлтты халқының жұлдызы жоғары болатынына, туған елімізде дәулетті де сәулетті өмір орнайтынына сенемін», – деген еді. Міне, бүгінде Елбасының сенімі орындалып, ел үміті ақталды! Еліміз Көк байрағын желбіретіп, асқақ рухты Әнұранын қалықтатып, азат елге айналды. Ел іші тыныш, іргеміз бүтін болса, Қазақ елінің алар асуы мен шығар биігі – әлі алда. Бүгінгі шыққан биігіміз – Президентіміздің дара көшбасшылығының, сіздердің ерен еңбектеріңіздің, ел игілігі үшін атқарылған жұмыстардың нәтижесі, – деді А. Баталов.
Мұнан кейін облыс басшысы Алматы облысының ел дамуына елеулі үлес қосып отырғанын атап өтті. Мәселен, өңдеу секторының үлесі 85 % жетіп, еліміз бойынша ең жоғарғы көрсеткішке ие болған. Республика бойынша өндірілетін ауыл шаруашылығы өнімінің 17 проценті біздің өңірде өндіріледі. Сол сияқты А. Баталов мемлекеттік қолдаудың нәтижесінде облыста биылғы жылы 133 білім беру нысаны, яғни 27 мектеп пен 96 жекеменшік балабақша іске қосылғанын тілге тиек етті.
– Құрметті қауым! Баршаңызды ұлық мерекеміз – Тәуелсіздік күнімен тағы да құттықтаймын! Табыстарыңыз мол, шығар асуларыңыз биік болсын! Көк туымыз тұғырлы, Тәуелсіздігіміз ғұмырлы болсын! – деп өзінің ізгі тілегін жеткізді.
Өңірдегі өнеркәсіп, аграрлық сала, денсаулық сақтау, білім беру, кәсіпкерлік, спорт және әлеуметтік қызмет көрсету салаларының үздік мамандарына ұзақ жылғы еңбегі мен жемісті қызметі үшін «Парасат», «Құрмет», III дәрежелі «Еңбек даңқы» ордендері, «Ерен еңбегі үшін», «Шапағат» медальдары, Қазақстан Республикасының Құрмет грамотасы, «Алматы облысының Құрметті азаматы» атағы берілді. Жоғары дәрежелі награда – «Қазақстанның Еңбек Ері» атағы даңқты спортшы, олимпиада чемпионы, белгілі меценат-кәсіпкер Жақсылық Үшкемпіровке бүгін Астана қаласында тапсырылды.
Награда алғандар атынан «Нүсіпов және К» ЖШС директоры Қанатхан Нүсіпов пен «Сұңқар Алматы» құс фабрикасының бас директоры Дмитрий Чалых сөз сөйлеп, өз құттықтауларын жеткізді.
Салтанатты жиын соңы концерттік бағдарламаға ұласты.
Алматы облысы әкімінің баспасөз қызметі.