«Талан» толықметражды көркем фильмінің түсірілімдері басталды
2016 жылдың 26 қазан күні бір топ журналистер қауымы режиссер Болат Қалымбетовтың «Талан» атты толықметражды көркем фильмінің түсірілім алаңында болды. Фильм Қазақстан Республикасының 25 – жылдық мерейтойына орайластырылған. Фильмді ҚР Мәдениет және спорт министрлігінің тапсырысы бойынша Ш.Айманов атындағы «Қазақфильм» АҚ өндіріске жіберген. Бүгінгі таңда түсірілім жұмыстарының жартысы түсірілген. Алда әлі екі апта түсірілім жұмыстары бар. Түсірілім алаңында болған журналистермен кездесу барысында Болат Қалымбетов фильм жайлы ойымен бөлісті: Бұл фильм тарихымыздың ең қиын кезеңдері –жиырмасыншы ғасырдың отызыншы, қырқыншы жылдарында орын алған оқиғаларды қарапайым адамдардың өмірі арқылы суреттейді. Фильмнің мақсаты сол замандағы адам бейнесін экранда көрсету.
Фильмнің аннотациясы: Фильмнің сценариі жазушы Жүсіпбек Қорғасбектің «Қасқыр-адам» повесінің желісі бойынша жазылған. Кинофильм тарихымыздағы аса күрделі кезеңді адам болмысының құбылысы арқылы танытқысы келеді.
Тағдырдың жазуымен бар өмірін елден жасырын өткізген адамның ортамен байланысы ақыры трагедиямен аяқталады. Осындай талайлы тағдырлар арқылы азаттық аңсаған ата-бабаларымыздың арманы – тәуелсіздіктің қадір-қасиеті көрінеді. Талан – тағдырдың синонимі.
Фильмнің режиссері: Болат Қалымбетов
Сценарий авторлары: Ғазиз Насыров, Болат Қалымбетов
Фильмге түскен актерлер: Ерік Жолжақсынов(Таласбек), Шынар Жанысбекова(Бибісара), Ержан Нұрымбет(Шорман), Ұлан Нүсіпәлі(Шүкір), Оңдасын Бесікбасов(Қастек), Асан Киркабаков(Тағай), Жасұлан Әйтенов(Керім), Қаршыға Әлікенов(Тағайдың бала кезі), Аян Өміржан(Керімнің бала кезі).
Анықтамалық ақпарат:
Болат Нұрғалиұлы Қалымбетов – кинорежиссер, актер. Қазақстанның еңбек сіңірген қайраткері(1998). КСРО Кинематографистер одағының мүшесі(1984). 1955 жылы 20 маусымда Алматы облысы, Нарынқол ауылында дүниеге келген. 1977 жылы Құрманғазы атындағы Қазақ мемлекеттік консерваториясының актер мамандығын тәмамдаған (Х.Бөкееваның шеберлігі); 1989 жылы Алматы театр және кино институтында режиссер мамандығы бойынша оқыған. 2009 жылы «Құрмет» орденімен марапатталған.
ТҮСІРГЕН ФИЛЬМДЕРІ: «Тамшы» (КФ, 1989, к.м.), «Айналайын» (КФ, 1990), «Последние холода» (ТПО «Катарсис», 1993); «Сардар» (КФ, 2004).