Теміржол тасымалдарына арналған тарифтер туралы
Қазақстан темір жолдарының тармақталған желісі алыс қашықтыққа темір жол көлігімен жүктердің үлкен көлемін тасымалдауды ұйымдастыруға мүмкіндік береді.
Бұл жоғары сенімділік пен қауіпсіздікті қамтамасыз ететін ең әмбебап және арзан көлік түрлерінің бірі.
Ағымдағы жылдың 7 айында темір жол көлігімен 232 млн.тонна жүк тасымалданды, бұл өткен жылдың сәйкес кезеңімен салыстырғанда 1,9%-ға артық (2019 жылғы қаңтар – шілде-227,6 млн. тонна).
Бұл ретте, жүк айналымы 168,7 млрд.ткм құрап, 4,4%-ға артты (2019 жылғы қаңтар – шілде-161,7 млрд.ткм).
Темір жол көлігін теңгерімді реформалау бойынша жүргізіліп жатқан саясаттың арқасында бүгін біз темір жол тасымалдарының тиісті өсуін байқаймыз.
Бұл ретте, монополияға қарсы орган құратын икемді тариф белгілеу жүйесіне маңызды рөл бөлінеді.
Тарифтер туралы айтатын болсақ, барлық теміржол көлігі табиғи монополия ретінде реттеледі.
Тарифтердің көпшілігін Табиғи монополияларды реттеу комитеті (монополияға қарсы орган, реттеуші) белгілейді. Транзиттік тасымалдарға, сондай-ақ реттелмейтін вагондар мен контейнерлерді жеткізуге арналған тарифтер ерекшелік болып табылады, өйткені олар нарықтық бәсекелестіктің ықпалында.
ҚР Индустрия және инфрақұрылымдық даму министрлігі Көлік комитеті төрағасының орынбасары Жәнібек Тайжановтың айтуынша, ел ішінде жүк тасымалдау тарифі, экспорт, импорт бірыңғай болып табылады және біріздендірілген деп аталады.
Оның құрамына бірнеше құрамдас бөліктер кіреді, олар-жүк және коммерциялық жұмыс, вагондарды жалдау, магистральдық теміржол желісі және локомотивтік тартым, онда соңғы екі құрамдас бөлікті монополияға қарсы орган бекітеді.
Тарифтік компоненттердің орташа үлесі тасымалдау қашықтығына, локомотивтік тартым түріне және жүк түріне байланысты өзгереді.
«Бүгінгі таңда қазақстандық біріздендірілген тариф деңгейі Еуразиялық экономикалық одаққа мүше мемлекеттердің біріздендірілген тарифтерінен едәуір төмен, бұл тек ел ішінде ғана емес, сондай-ақ импорттық-экспорттық тасымалдарды дамыту үшін қолайлы жағдай жасайды.Бұл ретте транзиттік қатынаста жүктерді тасымалдауға арналған темір жол тарифін монополияға қарсы орган реттемейді және келісілген тарифтік саясат туралы халықаралық келісімдер шеңберінде белгіленеді»,- деп қорытындылады ҚР ИИДМ Көлік комитеті төрағасының орынбасары Жәнібек Тайжанов.