14 мамыр күні Қазақстан Республикасының Халық әртісі, КСРО Мемлекеттік сыйлығының лауреаты Нұржұман Ықтымбаев 80 жасқа толған мерейтойын атап өтуде. Актерді Қазақстан Республикасының Президенті Қасым-Жомарт Тоқаев құттықтады.
«…Сізді отандастарымыз кино өнерінде өзіндік қолтаңбасы бар халық әртісі, танымал тұлға ретінде жақсы біледі және құрметтейді. Жарты ғасырдан астам уақыт бойы екі жүздей кинокартинаға түсіп, күрделі, болмыс-бітімі бөлек рөлдерді асқан шеберлікпен сомдай білдіңіз. Табиғи дарыныңызды отандық және шетелдік режиссерлер мен сыншылар қашанда жоғары бағалайды. Еліміздің рухани-мәдени байлығын дамытуға қосқан үлесіңіз өте мол. Сізге зор денсаулық, ұзақ ғұмыр және әулетіңізге құт-береке тілеймін», – делінген Мемлекет басшысының құттықтау мәтінінде.
Бүгін Алматыдағы Ұлттық киноны қолдау мемлекеттік орталығында мерейтой иесіне құрмет көрсетілді, онда Нұржұман Байжұманұлы достарымен, әріптестерімен және оқушыларымен кездесті. Кездесудің ашылуында жүргізушілер ҚР Мәдениет және спорт министрі Ақтоты Райымқұлованың атынан мерекелік құттықтауды оқыды.
Іс-шара аты аңызға айналған «Алматы» қонақ үйінде өтті, оның жанында Нұржұман Байжұманұлы ұстазым деп санайтын көрнекті кинорежиссер Шәкен Аймановқа ескерткіш орнатылған,. Кино орталығының басшыларымен бірге мерейтой иесін құттықтауға Қазақстанның Халық әртісі, актер әрі кинорежиссер Досхан Жолжақсынов, Қазақстан Республикасының еңбек сіңірген әртісі, көпшілік көрерменнің сүйіктісі Тамара Қосыбаева, Қазақстан Республикасының еңбек сіңірген қайраткері, кинорежиссер және продюсер Рүстем Әбдірашев және т.б. көптеген белгілі кино қайраткерлері келді.