Қазақстан Республикасы Парламентінің Сенатында суға батып кеткен кемелерді жою туралы Конвенция ратификациялауға ұсынылды.
ҚР Индустрия және инфрақұрылымдық даму министрі Бейбіт Атамқұлов ҚР Парламенті Сенаты депутаттарына 2007 жылғы “Суға батқан кемелерді алып тастау туралы Найроби конвенциясын ратификациялау туралы” заң жобасын таныстырды.
Найроби конвенциясы теңіз апаттарының салдарын тез арада жоюды, оның ішінде суға батқан кемелерді көтеруді және теңіздің ластануын болдырмауды қамтамасыз ету үшін бірыңғай қағидалар мен рәсімдер жасауға бағытталған.
Конвенция Халықаралық теңіз ұйымының жетекшілігімен қабылданды. Оған әлемнің 53 мемлекеті қосылды.
Қазақстан үшін бұл құжатқа қол қоюдың маңызы зор.
Конвенцияны ратификациялау теңіз апаты туындаған кезде елдің мүддесін қорғау үшін қажетті жағдайлар жасауға мүмкіндік береді. Және Қазақстан суларына кіретін кеме иелерінің жауапкершілігін сақтандыру және суға батқан кемені алып тастағаны үшін өзге де қаржылық қамтамасыз ету міндеттерін белгілейді. Сондай-ақ, Қазақстанға кеме иесінің қатысуынсыз тікелей сақтандыру компаниясына кемені көтеру шығындарын өтеу туралы талап қоюға мүмкіндік береді.
Кемеге туы ілінген мемлекеттің теңіз әкімшілігінен кеме иесінің кемені көтеру және апат салдарын жою жөніндегі міндеттемелерін орындауда оларға берілген сақтандыру туралы куәлік түрінде кепілдік алынады.
Теңіз апаты туындаған кезде Қазақстанның теңіз әкімшілігінің, кеме иесінің және шетел кемесінің теңіз әкімшілігінің іс-қимыл тәртібі айқындалады.
Анықтама үшін:
Транскаспий халықаралық көлік бағыты белсенді түрде дамып келеді. Каспий маңындағы порттармен жаңа паромдық қатынастар және тұрақты контейнерлік желілер ашылуда. 2020 жылы 1283 кеме кірген.
2025 жылға қарай Ақтау және Құрық теңіз порттары арқылы тасымалданатын жүк ағынын 10 млн. тоннаға дейін ұлғайту жоспарланып отыр. Тиісінше Қазақстан суларына кіретін кемелер саны артады.