2016 жылы Ақтөбе облысында 560 мың гектардан астам алқапқа егін егіледі
Ақтөбе облысының әкімі Бердібек Сапарбаев жұмыс сапарымен Мәртөк ауданына барды. Аймақ басшысы, алдымен, көктемгі алқап жұмыстарымен танысты.
Биыл Ақтөбе облысында 561,2 мың гектар алқапқа егін егу жоспарланып отыр. Өткен жылмен салыстырғанда егін алқаптары 48,4 мың гектарға артқан. Егін егу жұмыстары бүгінде барлық аудандар мен Ақтөбе қаласында жүргізіліп жатыр.
Ауыл шаруашылығы басқармасының мәліметтеріне қарағанда, өңірдегі ауыл шаруашылығы құрылымдары қажетті техникамен, отынмен толықтай қамтамасыз етілген. Биыл Ақтөбе облысында 6,5 мың тонна арзандатылған отын бөлініп отыр.
Жалпы алғанда, көктемгі алқап жұмыстары Ақтөбе облысында егін егу жұмыстарының мерзімінде аяқталатынын білдіреді. Бүгінде өңірдегі егін алқабының 60 %-на егін егілді.
Мәртөк ауданының шаруалары егін егу жұмыстарын 5 маусымға дейін аяқтағалы отыр. Бұл туралы облыс әкімі Бердібек Сапарбаевпен кездесу кезінде аудандағы ірі шаруа қожалықтарының өкілдері хабарлады.
Өңір басшысы Мәртөк ауданына жұмыс сапарының мақсаты Мемлекет басшысының азық-түлік қауіпсіздігі және жұмыспен қамту жөніндегі тапсырмаларының орындалу барысымен танысу деп түсіндірді.
— Ауыл шаруашылығының азық-түлік қауіпсіздігін қамтамасыз етуде маңызы зор. Алайда тек егін шаруашылығын емес, мал шаруашылығын да дамытқан жөн. Өңірде тек егін егумен шектелетін ірі шаруа қожалықтары бар, біздіңше бұл дұрыс емес. Мал шаруашылығы қолда бар ресурсты толық пайдалануға мүмкіндік береді. Сонымен қатар халықты жыл он екі ай жұмыспен қамтуға көмектеседі, – деп атап өтті Бердібек Сапарбаев.
Өңір басшысы суармалы жерлерді пайдалану туралы сөз қозғады.
– Біз суармалы алқап көлемін арттыруымыз керек. Ол үшін облыста барлық мүмкіндік бар. 3 су қоймасы, 30-ға тарта өзен, көлдер бар. Тек оларды дұрыс әрі тиімді пайдалана білу керек. Сонда ғана азық-түлік те, малға жем де, халыққа жұмыс та болады, – деді Бердібек Сапарбаев.
Айта кетейік, 2015 жылы Ақтөбе облысында суармалы жерлердің жартысынан астамы игерілді. Биыл оларды суармалы алқаптың ауданы 12 мың гектардан 18,8 мың гектарға дейін арттырылады.
«Ақтөбе ақпарат» орталығы