9 қараша, 2016. «Қазақконцерт» мемлекеттік концерттік ұйымы» қазақ әндері негізінде жазылған тұңғыш қазақша мюзиклді көрермен назарына ұсынды. Жаңа музыкалық қойылым – бірегей туынды.
Үстіміздегі жылы Астанаға қоныс аударған қазақ эстарадасының қара шаңырағы, Елорда төрінен «Astana Musical» театрын құрды. Ол – еліміздегі тұңғыш мамандандырылған мюзикл театры. Алғашқы қойылым – «Достар серті» спектаклі. Мюзикл қазақтың көрнекті композиторлары – Ш.Қалдаяқов, Е.Хасанғалиев, «Дос-Мұқасан» тобы мен халық әндері негізінде жазылған. Еліміздің әр өңірінен консерваторияға оқуға келген төрт жігіттің басынан кешкен қызықты оқиғалары, жастық шақ, махаббат жайы, талай сынақтан сүрінбеген достық туралы баяндалады.
Либретто авторы – ҚР еңбек сіңірген қайраткер-Бақыт Қайырбеков, драматург – Әннас Бағдат. Қойылым музыкасын жазған ҚР еңбек сіңірген қайраткер – Артур Оренбургский. Мюзикл режиссері- Еслям Нұртазин. Хореографтар – Әсем Шарифуллина, Дәулет Мұратбеков.