2016 жылы 2 қыркүйекте сағат 16.00-де Ә. Қастеев атындағы Мемлекеттік өнер музейінде Алексей Уткиннің алмалы қаланың 1000 жылдығына арналған «Алматы – менің махаббатым» атты жеке көрмесі ашылады. Онда суретшінің 60-қа жуық кескіндемелік және графикалық жқмыстары қойылады. Шебердің шығармашылық өмірбаянында Вашингтондағы «ІІ жол» және Нидерландының Корольдік Елшілігіндегі «Тюльпан және адам» көрмелерін қосқанда, ондаған көрмесі мен марапаттары бар.
Алексей 1949 жылы Алтайда дүниеге келді, одан кейін үй іші Алматыға көшіп, оның балалық шағы осында өтті. Уткин 1969 жылы Алматы қаласындағы саңырау балаларға арналған № 1 мектеп-интернатын, 1974 жылы Ленинградтағы саңырауларға арналған көркемсурет техникумын, 1985 жылы Алматы театр-көркемсурет институтынтәмамдады. Суретші ұзақ уақыт бойы өзі оқыған саңырау балаларға арналған мектеп-интернатта сабақ берді. 1999 жылдан Алексей Уткин Қазақстан Суретшілер одағының мүшесі. Ол 1995 жылы «Қазақстандағы Саңырау суретшілер қауымдастығының коммерциялық емес бірлестігін» құрып, соның президенті болды.
Алексей Уткин суреттен сабақ бере жүріп, көп уақытын жеке шығармашылығына бөлді, қолтаңбасын ширықтырып, шеберлігін ұштады.1985-1990 жылдары «Шмель» және «Крокодил» сатиралық журналдарының штаттан тыс суретшісі болып жұмыс істеп, тамаша карикатура мектебінен өтті.
Суретші өзін әр жанрда сынап көрді – портрет те, натюрморт та, карикатура да салды. Бірақ соның ішінде қала пейзажы оның сүйікті тақырыбы болып қалды. Ол үшін сарқылмас шабыт көзі – Алатаудың етегінде орналасқан көрікті Алматы қаласы. Біздің алдымызда – суретшінің өзінің жанына жақын, көзіне ыстық көше қиылыстары, кең даңғылдары мен тыныш көшелері, кафелері мен театрлары, фонтандары, туған сүйікті қаласының көріністері бейнеленген «Махаббат қаласы», «Қала ноктюрны», «Бульвар… көпір… арық», «Алматының сұлбасы», «Көктем тынысы» және т.б. зор шабыт пен сазға толы жұмыстары.
Оның сиқырға толыАлматы бұрыштарының сансыз пейзаждары думанға толы алып шаһардың көңіл күйін, оның қым-қуыт тірлігін, жыл мезгілдерінің таң-тамаша бояуларын, шуақты және жауынды күндерін, ымырт түскен шақтарын, түрлі дәуірдің бірегей сәулеттік ғимараттары – Сталин заманының кірпештен салынған неоклассикасын, 70-80 жылдардағы кеңестік бетон модернизмін және ең заманауи хай-текті шеберлікпен берген. Суретші түске және формаларға эксперимент жасайды, қала сұлбаларын қара контурмен жиі салады, абстрактылық, импрессионистік және реалистік композициялар құрайды. Ол туған қаласының әдемі жақтарын іздеп табудан және оны өз туындыларында қылқаламмен асқақтата жырлаудан жалықпайды.
Көрменің жетекшісі – Клара Исабаева – Ә. Қастеев атындағы ҚР МӨМ-нің менеджмент және сыртқы байланыс орталығының жетекшісі