Ақтөбеде міндетті әлеуметтік сақтандыру жүйесін түсіндіру жөніндегі жұмыс тобы құрылды
2017 жылдың 1 қаңтарынан бастап Қазақстанда міндетті әлеуметтік медициналық сақтандыру жүйесі енгізілмек. Осыған байланысты Қазақстанның барлық өңірлерінде жүйенің негізгі принциптерін түсіндіру бойынша кең ауқымды науқан басталды. Дәл осындай мақсатпен Ақтөбеге келген ҚР Денсаулық және әлеуметтік даму министрі Тамара Дүйсенова облыстағы емдеу мекемелері мен емханалардың басшыларымен және дәрігерлермен кездесті.
Кездесу кезінде мейман мемлекеттің азаматтарды тегін медициналық көмектің кепілдендірілген мөлшерімен қамтамасыз ету құқығын сақтап қалатынын айтты. Оған әлеуметтік маңызға ие аурулармен сырқаттану, жедел жәрдем, санитарлық авиация және вакцинация кезінде көрсетілетін көмектер кіреді. Мемлекет халықтың экономикалық белсенді емес бөлігінің, жұмыс берушілер оларға жалданып отырған жұмыскерлердің жарнасын төлесе, салық органдарында тіркеуде тұрған жұмыскерлер мен өзін-өзі жұмыспен қамтып отырғандар өз жарналарын өздері төлейтін болады.
– Дәрігерлер қауымдастығы алдында сөз сөйлеген министр жаңа міндетті медициналық сақтандыру жүйесінің мақсаты азаматтардың өз денсаулығын сақтауға деген жауапкершілігін бірдей деңгейде арттыру екенін атап өтті. Жүйе әрбір қатысушыға оның тапқан табысының мөлшеріне қарамастан бірыңғай және кең ауқымды медициналық қызмет түрлерін пайдалану құқығын береді. Сонымен қатар қаржыны оған мұқтаж еместерден көбірек мұқтаждық көріп отырғандардың игілігінепайдалану үшін қайта бөлуге болады, – дейді жаңа жүйенің пайдалы тұстарынайтқан Ақтөбе облыстық денсаулық сақтау басқармасының басшысы Әсет Қалиев. Ол сондай-ақ Тамара Дүйсенованың міндетті әлеуметтік медициналық сақтандырудың негізгі принциптерін екжей-текжейлі түсіндіріп, кездесуге келгендердің барлық сауалдарына жауап бергенін атап өтті.
– Бүгінгі күні бізде жұмыс тобы құрылып, оған медициналық мекемелердің, жұмыспен қамту және әлеуметтік бағдарламалар органдарының, мемлекеттік кірістер жөніндегі департаменттің басшылары енгізілді. Жаңа жүйенің облыстың барлық тұрғынын қамтуы үшін жұмыс тобы халық арасында түсіндіру жұмыстарын жүргізеді. Бұл жұмысқа барлық аудандардың және селолық округтердің әкімдері тартылады, – деді Әсет Қалиев.
«Ақтөбе Ақпарат» орталығы