Астананың мерейтойына арналған іс-шаралар бағдарламасы дипломатиялық корпусқа ұсынылды
АСТАНА, 2018 жыл 31 мамыр – Сыртқы істер министрлігінде Астананың 20 жылдығына арналған мерекелік іс-шаралардың күнтізбесімен таныстыру өтті. Қазақстанда аккредиттелген дипломатиялық корпусы үшін ұйымдастырылған арнайы брифингіде Сыртқы істер министрі Қайрат Әбдірахманов, Астана қаласының әкімі Әсет Исекешев, G-Global Халықаралық хатшылығының басшысы Серік Нөгербеков және оның орынбасары Мұрат Кәрімсақов сөз сөйледі.
Қ. Әбдірахмановтың айтуынша, Президент Нұрсұлтан Назарбаев Астананың халықаралық мәртебесіне, оның жаһандық дипломатиядағы, қазіргі кездегі күрделі мәселелерді шешудегі және ынтымақтастық орнатудағы рөліне үлкен мән береді. Сондықтан Астана мерейтойы ұлттық және халықаралық ауқымдағы оқиға болып табылады. Сыртқы істер министрлігі елорданың 20 жылдық мерейтойын атап өтуге белсенді қатысуда.
2018 жылы 5 маусымда Министрлік Тұңғыш Президент – Елбасының Кітапханасы және Қорымен бірлесіп, жоғары халықаралық қонақтардың қатысуымен «Астана – бейбітшілік қаласы» тақырыбында халықаралық конференция өткізеді. Конференцияда өңірдегі және әлемдегі қауіпсіздік пен даму мәселелерін шешу, интеллектуалдық қалалық технологияларды енгізу және Астанадағы қаржы, сауда және көлік инновациялық хабын дамыту бойынша жаңа идеялар талқыланатын болады.
Сонымен қатар, Министр шет елдердегі қазақстандық елшіліктерде қазақстандық өнер шеберлердің концерттері, фотокөрмелері, конференциялары, брифингтері, «дөңгелек үстелдері» және Астанаға арналған басқа да іс-шаралар өтіп жатқаны туралы хабарлады.
Астана қаласының әкімі брифинг қатысушыларына елорданың мерей тойына орай үлкен дайындық жұмыстары жүргізіліп жатқаны туралы хабарлады. Орталық мемлекеттік органдармен және облыстық әкімдіктермен бірге мерекелік іс-шаралардың ауқымды бағдарламасы дайындалды.
Ә.Исекешев 2018 жылы елордамыз шетелден және өңірлерден 1 млн.астам туристерді қабылдауға дайын екендігін, ал бұл үшін қалада 200 қонақ үй мен 1100 қоғамдық тамақтану орындары дайындалғанын атап өтті. Жаңа әуежай терминалы мен жаңа теміржол вокзалы қонақтарды қабылдауға толық дайын.
Сонымен қатар, қала әкімі мерейтой күні Астанада 7 жаңа саябақ пен алаң ашылатындығын хабарлады. 39 мыңға жуық ағаш және 157 мың шаршы метрге гүлзарларын отырғызу жоспарланып отыр.
Астана қаласы әкімдігі Мәдениет басқармасының бастығы Болат Мажағұлов 600-ден астам іс-шарадан тұратын мәдени-спорттық бағдарлама туралы әңгімелеп берді.
Брифинг барысында шетелдік дипломаттарға Мемлекет басшысының бастамасымен 2-3 шілдеде Астанада өткізілетін «Global Silk Road» Жібек жолы елдерінің қала әкімдерінің форумы тұжырымдамасы ұсынылды. Форум алғаш рет өткізіліп, Astana Finance Days аясындағы негізгі іскерлік шаралардың бірі болады. Онда «Астана» Халықаралық қаржы орталығы ресми түрде іске қосылады.
G-Global хатшылығының мәліметі бойынша, бүгінгі күні Форумға 51 елдің 1500 қатысушысы, оның ішінде әлемнің әртүрлі қалаларының әкімдері мен саяси, ғылыми және іскерлік топтардың өкілдері бар.
Шетелдік дипломаттар Қазақстан астанасының 20 жылдық мерейтойына орай өткізілетін бірлескен іс-шараларға қатысуға үлкен қызығушылық танытып, өз ұсыныстарын білдірді.
Қазақстан Республикасы
Сыртқы істер министрлігінің
Баспасөз қызметі