15 шілде, 2016. Кеше Алматы қаласында киноөндірісті дамыту тұжырымдамасы және кино туралы заң жобаларын талқылауға арналған дөңгелек үстелдің екінші күні өтті. Аталмыш саланың жетекші отандық сарапшылары қазақстандық киноны дамыту және саланың өзекті мәселелерін шешу бо йынша өз пікірлерін ортаға салды.
Бүгін талқылауға жас кинематографистер қосылды. Асқар Бисембин, Баян Ерімбет, Эля Гильман, Әділхан Ержанов, Sulpak Stela, Әлішер Сүлейменов, Темірлан Төлегенов және т.б. отандық киноөндірісті дамытудың ең тиімді жолдарын іздестіруге белсенді атсалысты. Кездесуде авторлық құқық, кино қорын құру, Қазақфильм жұмысының жаңа форматы талқыланды.
Пікір алмасу барысында отырыс қатысушылары «Қазақфильм» АҚ жанында қазақстандық кино қорын және мемлекеттік кино қорын құру, сонымен қатар Қазақфильм аумағында киноның арнайы экономикалық аймағын жасақтау секілді алдыңғы қатарлы мәселелерді қазақстандық киноны дамыту Тұжырымдамасының жобасына енгізудің қажеттілігі туралы да сөз етті. Отырыста айтылып кеткендей, төл материалды-техникалық базаның (павильондар, реквизиттер, құрылғылар, т.б.) болуы «Қазақфильм» АҚ-на кинофабрика ретіндегі қызметін жүзеге асыру жолында басымдылық береді.
Іс-шарада бас қосқан мамандар осы салада жұмыс істейтіндердің құқығын қорғау, қазақстандық кино қорын құру, салық жеңілдіктерін қамтамасыз ету үшін кино туралы заңның міндетті түрде қажет екендігіне бірауыздан келісті. Сарапшылар сәйкес құжаттың бекітілуі жаңа қаржылық ағымдар мен жеке инвестицияларға жол аша отырып, тәуелсіз кино және мемлекеттік тапсырыспен түсірілетін фильмдердің тиімділігін арттыратындығына сенімді. Бұның барлығы шығармашылық адамдарды әлемдік деңгейдегі фильмдерді түсіруге шабыттандырып, ұлттық тарихымыз бен мәдениетімізді әлемдік қауымдастыққа таныстыруға қосымша мүмкіндік береді.
Дөңгелек үстелдің өткізілуі Мәдениет және спорт министрлігі мен киноқауымдастықтың арасында жемісті сұхбат алаңына айналды. Шараға қатысушылардың барлығы заманауи кинематографияның өзекті мәселелері туралы ашық айтып, мәселелердің кең ауқымы бойынша өз пікірлерін білдіруге мүмкіндік алды.
ҚР Мәдениет және спорт министрлігінің Баспасөз қызметі