Б.Сапарбаев: Әйелдердің кез келген бастамасын қолдаймыз
Ақтөбе облысының әкімі Бердібек Сапарбаев мыңнан астам нәзік жандыларды көктемгі мерекелерімен құттықтады.
Тәуліктің алғашқы жартысында облыс басшысы «Думаш» мейрамханасында танымал ақтөбелік әйелдермен, ал түстен кейін Жастар сарайында облыс аудандарынан шақырылған 900 әйел азаматпен кездесті.
Аймақ басшысы барлық әйелді 8 наурыз мерекесімен құттықтады.
– Сіздер әр адамның өмірінде маңызды орын аласыздар. Патриоттық қоғам тәрбиелеуде сіздердің қосатын үлестеріңіз орасан зор. Өйткені өскелең ұрпақты тәрбиелеу сіздің мойныңызға артылған жүк іспетті. Тәуелсіздік жылдары Қазақстан экономикасының дамуына қосып келе жатқан еңбектеріңізді бағалаймыз. Өз тарапымыздан бизнестегі және өзге де бастамаларыңызды одан әрі қолдау үшін барлығын жасаймыз, – деп сөз берді Бердібек Сапарбаев.
Залда отырған әйелдердің қай-қайсысы да өздерінің кәсіби және қоғамдық қызметтерінде үлкен жетістіктерге қол жеткізген. Көпбалалы аналар Айнұр Бекеева, Ұлсұндық Бөкенбаева, Зауре Жұпар, Шолпан Алтынбекова және Жұмагүл Серікова, мәселен, елдегі демографиялық ахуалдың жақсаруына үлес қосты. Көпбалалы аналар Бердібек Сапарбаевтың қолынан «Алтын алқа» алса, Құндыз Ізмағамбетова мен Оксана Ляховаға «Күміс алқа» тағылды.
Салтанат иелеріне мерекелік концерт ұйымдастырылды, Алматыдан этно-эстрадалық «Қоңыр» тобы арнайы шақырылды. Сонымен бірге танымал әншілер Жадыра Арыстанова, Қанат пен Светлана Айтбаевтар, Марат Әйтімов, Аллаберген Жақсыбаев және т.б. өнер көрсетті.
Мерекелік бағдарлама соңында облыстық филармония әртістері «Гүл сыйлайық әйелге» атты әнді шырқап, залда отырған әйелдердің барлығына гүл шоқтарын сыйлады.