Премьер-министрдің орынбасары бастаған топ Нұр-Сұлтандағы медициналық ұйымдарды аралады
Бүгін премьер-министрдің орынбасары Ералы Тоғжанов, Денсаулық сақтау вице-министрі Ажар Ғиният, Нұр-Сұлтан қаласы әкімінің орынбасары Бақтияр Мәкен және “СҚ Фармация” басшысы Ерхат Есқалиев елордадағы бірқатар медициналық ұйымдарды аралады. Мақсат – Президент Қасым-Жомарт Тоқаевтың коронавирус инфекциясының таралуын тоқтатуға қатысты жедел шаралар қабыладу туралы тапсырмасының орындалуына мониторинг жүргізу.
Арнайы топ бірінші 500 адамға арналған № 9 қалалық емханаға барды. Емханаға 95,6 мыңнан астам қала тұрғыны тіркелген, 62 дәрігерлік учаске жұмыс істейді, 5 жедел жәрдем бригадасы және 5 мобильді бригада бар. Күн сайын мұнда 200 астам онлайн-консультация жасалады және мобильді бригадалар орта есеппен 40 шақыруға қызмет көрсетеді.
Кездесу барысында қатысушылар медицина қызметкерлерінің жұмысымен танысты, қашықтықтан кеңес беру және онлайн-консилиум өткізу үшін қажетті техниканың бары-жоғын тексерді. Комиссия дәрілік заттарға арналған электрондық рецептер мен бағыттарды жазып беру процесін көрсетті. Сондай-ақ емханаға жүгінген пациенттерге медициналық көмек көрсету және қабылдауға арналған фильтр қызметін көрді.
Келесі нысан – қалалық жедел медициналық жәрдем станциясы. Оның базасында эпидемиологиялық жағдайға мониторинг жүргізу және инфекциялық, провизорлық стационарларға емдеуге жатқызу үшін пациенттерді бөлу бойынша жедел шешімдер қабылдау үшін жедел штаб жұмыс істейді.
Жедел штаб чат-бот ұйымдастырды, онда күн сайын 140 өтініш өңделеді, байланыс орталығы арқылы өткен айда 5 мыңнан астам кеңес, ал соңғы тәулікте 211 кеңес берілді.
Күн сайын 70 жедел жәрдем бригадасы жұмысқа шығады, тәулігіне орта есеппен 1,5 мың дейін шақыруға қызмет көрсетеді. Карантинге дейін шақырулар саны күніне 3 мыңға жетті, бірақ соңғы үш апта ішінде тұрақты төмендеу динамикасы байқалады.
Сондай-ақ, вице-премьер Ералы Тоғжанов 600 орындық № 2 қалалық көпбейінді ауруханаға барды, мұнда жедел, жоспарлы медициналық көмек көрсетіледі және жүкті әйелдер мен босануға келгендерді де қабылдайды. Тексеру кезінде қабылдау бөлімі, триаж-жүйесі және реанимация бөлімін аралады. Қатысушылар ауруханаларды аралағанда қорғаныс костюмін киіп жүрді де, соңында медицина қызметкерлері бастан кешіп жүрген қолайсыздықты ескерді.
Премьер-Министрдің орынбасары медицина қызметкерлеріне жанқиярлық еңбегі үшін алғыс айтып, денсаулық пен төзім тіледі.