Бірлік мерекесі қарсаңында Ақтөбе облысында 700-ге тарта шара ұйымдастырылды
1 мамыр Қазақстан халқы бірлігі күнінде Ақтөбе қаласы мен облыс аудандарында бұқаралық мерекелік шаралар ұйымдастырылды.
Мереке қарсаңында Әйтеке би, Ойыл, Қобда аудандарында “Бір халық, бір ел, бір тағдыр”, “Қазақстан – халықтар достығы бесігі” деген тақырыптармен дөңгелек үстелдер, Хромтау, Алға аудандарында “Бейбітшілік – бауырластық белгісі”, “Бір шаңырақ астында” деген тақырыптармен сайыстар ұйымдастырылды.
Облыс әкімі Бердібек Сапарбаевтың қатысуымен Тұңғыш Президент атындағы саябақта да дәстүрлі мерекелік шаралар өтті. Оған облыстағы барлық этномәдени бірлестіктер мен балалар шығармашылық ұйымдары қатысты. Ұлттық киімдер сан алуандығын тек Қазақстан халқының бірлігі күнінде көруге болады.
Аймақ басшысы қала тұрғындары мен қонақтарын мерекемен құттықтап, таяуда Елбасы жариялаған, мемлекеттер арасындағы бейбітшілік пен ынтымақтастыққа бағытталған “Әлем. XXI ғасыр” Манифестінің мәнін атап өтті.
– Біздің мемлекетте түрлі ұлт өкілдері тату-тәтті өмір сүріп жатыр. Халық бірлігі – қазақстандықтардың жетістіні, ал біздің тәуелсіз еліміздің тарихы – барлық ұлыстардың достығының күнтізбесі іспетті. Этносаралық толеранттылық пен қоғамдық келісімді сақтау тәуелсіз Қазақстанның басты әрі талассыз жетістігі болып есептеледі. Ұлттық бірлікті күшейту еліміз бен халықтың табысты болашағының кепілі болып қала береді. Әсіресе бүкіл әлем экономикалық және саяси дағдарысқа төтеп беру үшін қазіргі таңда өте маңызды. Біз күшімізді біріктіре отырып, кез келген дағдарысты жеңе аламыз, – деп атап өтті Бердібек Сапарбаев.
Қала тұрғындары алдында «Достық сазы» фольклорлық ансамблі, этномәдени бірлестіктер, Ғазиза Жұбанова атындағы облыстық филармония, жоғары және орта арнайы оқу орындарының шығармашылық ұжымдары, “Еңлік” және “Искорки” би ансамбльдері, «Волшебный башмачок» классикалық би студиясы өнер көрсетті.
Облыс көлемінде өскелең ұрпақтың бойында патриоттық сезімді, бірлік пен қоғамдық келісімге тәрбиелеуге бағытталған 700-ге тарта шара ұйымдастырылды.
«Ақтөбе ақпарат» орталығы