Қазақстан мен Жапонияның толық ядролық қарусыздандыруға қол жеткізуге моральдық құқығы мен міндеті бар
АСТАНА, 2018 жылғы 20 қыркүйек – Қазақстан Республикасы Тұңғыш Президенті – Елбасы Қорының жанындағы Әлемдік экономика және саясат институтында (ӘЭСИ) «Ядролық қарусыздандырудағы Қазақстан-Жапония ынтымақтастығы: бір тағдыр, ортақ мақсат» тақырыбында халықаралық конференция өтті. Аталған іс-шара Гои бейбітшілік Қорымен және «Бейбітшілікке дұға қылу» қоғамымен бірлесе ұйымдастырылды.
Конференцияның ашылу салтанатында ҚР Сыртқы істер министрінің орынбасары Ержан Ашықбаев сөз сөйлеп, Қазақстан Президенті Нұрсұлтан Назарбаевтың қатаң саяси ерік-жігерін және Қазақстан халқының толық ядролық қарусыздандыруға қол жеткізуге бейілділігін, сондай-ақ мемлекетаралық және азаматтық қоғам деңгейлерінде күш-жігерді жұмылдыру қажеттігін атап өтті. Қазақстандық дипломат Мемлекет басшысының қарусыздандыру саласындағы бастамаларының тарихи маңыздылығын атап өтіп, Қазақстанның бастамасымен Хиросима мен Нагасакиге атом бомбаларының тасталғанына 70 жыл толған – 2015 жылы Қазақстанның бастамасымен қабылданған Ядролық қарудан азат әлемге қол жеткізудің жалпыға бірдей декларациясының және «Әлем. ХХІ ғасыр» Манифесінің маңыздылығына назар аударды.
Оған қоса Е. Ашықбаев екі мемлекеттің түрлі саладағы ынтымақтастығын, әсіресе халықаралық қауіпсіздікті қамтамасыз ету, оның ішінде ядролық қарусыздандыру және таратпау саласындағы тығыз әріптестікті атап өтті.
Сонымен қатар, Гои бейбітшілік Қоры және «Бейбітшілікке дұға қылу» қоғамының Президенті Хироо Сайонджи және ҚР Тұңғыш Президенті – Елбасы Қорының атқарушы директоры Қанат Жұмабаев алғы сөз сөйледі.
Конференция жұмысына спикер ретінде «Невада-Семей» халықаралық қозғалыстың көшбасшысы Олжас Сүлейменов, ҚР Парламенті Мәжілісі Халықаралық қатынастар, қорғаныс және қауіпсіздік комитетінің мүшесі Абай Тасболатов, «АТОМ» жобасының Құрметті елшісі Кәріпбек Күйіков және қоғам қайраткері Саясат Нұрбек қатысты.
Пікірталас барысында тараптар ядролық қарусыздандыру және таратпау үрдісінің жалғасып келе жатқан тоқырауы, ядролық қарудан азат әлемге қол жеткізу үшін жаһандық күш-жігерді ілгерілетудегі Қазақстан мен Жапонияның рөлі және аталған үрдістерге азаматтық қоғамды кеңірек тарту қажеттігі жөнінде пікір алмасты.
Қазақстан Республикасы
Сыртқы істер министрлігінің
баспасөз-қызметі