«Қазақфильмнің» «Арман әлемі» жобасы түсірілім жұмыстарын бастауға дайын
Ш.Айманов атындағы «Қазақфильм» киностудиясының Эксперттік кеңесі Қазақстандық жазушы Данияр Сүгіралиновтың «Кірпіштер 2.0» атты кітабының желісі бойынша түсірілетін «Арман әлемі» фильмінің режиссерлік сценарийін талқылап қабылдады. Фильмнің режиссері Фархат Шәріпов.
Бүгінгі таңда дайындық кезеңі аяқталып, картинаның түсірілім тобы толықтай жинақталған. Картина құрамы түсірілім жұмыстарын бастауға дайын.
- Біз локацияларды көп іздедік. Ақыры іздегеніміз табылды. Сондай-ақ кастинг-директор екеуіміз басты рөлге қазақстандық барлық актерді қарастырып шықтық. Кітап желісінен алшақ кеттік. Көптеген өзгерістер енгіздік. Сценарийге терең мағына, образдылық қосылды. Меніңше, бұл тек сценарийді жақсартты деп ойлаймын, – деді Фархат Шәріпов.
Кинодраматург Нұрлан Санжар сценарийге қатысты өз ойын айтты: – Бүгінгі күннің адамы – оның өміріндегі сәтсіздіктері мен қуаныштары киноға тиімді әрі өзекті тақырып. Бұл тақырып тәжірибелі режиссерлерді және режиссерлік жолын енді бастап келе жатқандарды да толғандырып жүр. Киностудияның Эксперттік кеңесінің қоржынында бұндай тақырыпқа жазылған сценарийлер жоқтың қасы. Десек те, «Арман әлемі» сценарийінің авторы келешегінен үміт күттіретін жаңа киножобаны ұсынып отыр.
Жобаны талқылау барысында түсірілім тобы киімдердің эскиздерін, актерлердің видео және фотопробасын көрсетті. Фильмнің түсірілім алаңдары мен актерлер құрамы бекітілді. Қазақстандық жазушы Данияр Сүгіралиновтың «Кірпіштер 2.0» атты кітабының желісі бойынша түсірілетін «Арман әлемі» фильмінің түсірілім жұмыстары үстіміздегі жылдың наурыз айында басталады. Басты рөлде Қазақстанның танымал театр және кино актері Дулыға Ақмолда. Сондай-ақ фильмге: Ержан Түсіпов, Гүлжамал Қазақбаева, Әсел Калиева, Серік Шәріп, Филип Волошин және басқалар түседі.
Фильм өз өмірін өзгертуге ұмтылған жігіт туралы баяндалады. Қарапайым да мейірімді жігіт мақсатына жету үшін әдепсіз, өзімшіл, қатыгез адамға айналады. Адамның адалдығына сенуден қалып, танымастай өзгерген ол достарынан да айырылып, жалғыз қалады. Өмірінің осылайша өзгергенін қаламаған бас кейіпкер жан күйзелісіне ұшырап, ішімдікке салынады. Алайда маскүнемге қол ұшын созғандар табылып, енді ол нық сеніммен жаңа өмірге қадам басады.
– Өмірден өз орнын таба алмаған, әбден түңілген жастарға арналған бұл шығарма қанаттарын кеңге жайып, өмірлерін мәнді де мағыналы етіп өзгертуге шақырады, – деді «Кірпіштер 2.0» кітабының авторы Данияр Сүгіралинов.
Фильмнің түсіру тобы:
Режиссері әрі сценарий авторы: Фархат Шәріпов («Қызғылт қоян туралы хикая», «Инопланетяне ни при чем», «Ақ жол»)
Операторы: Александр Плотников («Қызғылт қоян туралы хикая», «Елбасы жолы», «Қазақ хандығы»)
Суретшісі: Алексей Шиндин
Композиторы: Эмиль Досов
Продюсері: Ержан Ахметов
Анықтама: Ш. Айманов атындағы «Қазақфильм» АҚ – Көркем, деректі, анимациялық кино өндірісі мен өндірістен кейінгі кезеңде тұрған өнімдермен (оның ішінде монтаждау, дыбыстау, т.б.) айналысатын Қазақстандағы негізгі кинокомпания. Ш.Айманов атындағы «Қазақфильм» киностудиясының тарихы 1934 жылдан бастау алады, дәл осы жылы Алматы кинохроника студиясы құрылды, ал 1941 жылы Алматы көркем фильмдер студиясы деп өзгертіліп, киностудияның өндірістік негізі барынша нығая түсті. 1941 жылы 15 қарашада Алматы киностудиясы Қазақстанға эвакуацияланған «Мосфильм және «Ленфильм» киностудияларымен бірлесіп, Бірлескен Орталық киностудия болып қайта құрылып, Алматыда 1944 жылғы дейін жұмыс істеді. Соғыс жылдары кезеңінде отандық көркем фильмдердің 80 пайызын аталмыш Орталық киностудия шығарды. 1960 жылы «Қазақфильм» атауына ие болды. 1984 жылы киностудияға ұлттық кинематогрфияның көрнекті қайраткері Шәкен Аймановтың есімі берілді.