2017 жылдың 1 қараша күні сағат 16.00 де Ә. Қастеев атындағы ҚР Мемлекеттік өнер музейінде Әбдірашит Сыдыхановтың 80-жасқа толуына орай ретроспективті көрмесінің ашылуы өтеді.
Әбдірашит Сыдыханов – қазақ бейнелеу өнерінің аса көрнекті қайраткері. Оның шығармашылық жолы 60-шы жылдардың ортасында басталды. Ол Алматы көркемсурет училищесін бітіргеннен кейін, «Қазақфильмге» суретші қызметіне келеді. Ол өзінің рухына жақын «алпысыншы жылғылар» деп аталатын қазақ суретшілерінің тобына қосылады. Алпысыншы жылғы-суретшілер – бұл 20 ғасырдың 60-жылдарының соңында қалыптасқан Қазақстан бейнелеу өнеріндегі ерекше ағым. Олар академиялық және идеологиялық ережелерге бағынбай, көркемөнер мектебінің ұлттық қағидаларын құруға тырысты. Ол топқа Салихитдин Айтбаев, Шаймардан Сариев, Әбдірашит Сыдыханов, Тоқболат Тоғызбаев, Бақтияр Тәбиев, Жанатай Шарденов, Төлеген Досмағамбетов, Еркін Мергенов және басқалар жатады.
Кинода жұмыс істеуден бөлек, Әбдірашит қондырғылы кескіндемемен әуестенеді. 70-ші жылдардың басында алпысыншы жылғылар рухында Сыдыханов «Темекі жинау» (1971) және «Тоғызыншы ықшам аудан» (1972) атты шығармаларын жазады, олар қазіргі уақытта Ә. Қастеев атындағы ҚР Мемлекеттік өнер музейінің тұрақты экспозициясында осы ағымның жарқын мысалы ретінде көрсетілуде. Бұл туындылар оптимизмге толы, үлкен формаларында Гогеннің әсері сезіледі.
Кейіннен, суретші өзінің жұмыс істеу стилін өзгертеді. Оны қазақтың рулық белгілері – таңба қызықтырады. Осы рулық белгілерді зерттей жүріп, ол бір қарағанда өте қарапайым белгілердің аса маңызды тарихи және мәдени ақпаратқа ие екендігі туралы қорытындыға келеді. Қазақтың таңба белгілері оның таңбалы кескіндемеге көшуіне негіз болды. Суретші олармен тәжірибе жасай бастайды, сондай-ақ, дәнді дақылдар, бұршақтар, жұмыртқа қабығын және басқа да материалдарды пайдалана отырып, аралас техникада жұмыс жасайды.
Көрмеде Әбдірашит Сыдыхановтың Ә. Қастеев атындағы ҚР Мемлекеттік өнер музейіндегі және жеке коллекциялардағы шығармалары көрсетіледі.