АЛМАТЫДА «ӘДІЛЕТТІ ҚАЗАҚСТАН: МЕМЛЕКЕТТІК ТІЛДІҢ БҮГІНІ МЕН БОЛАШАҒЫ» АТТЫ ХАЛЫҚАРАЛЫҚ ҒЫЛЫМИ-ТЕОРИЯЛЫҚ КОНФЕРЕНЦИЯ ӨТТІ
Алматы қ. 10.11.2022 ж.
Бүгін Алматыда Ахмет Байтұрсынұлы атындағы Тіл білімі институтының ұйымдастыруымен «Әділетті Қазақстан: мемлекеттік тілдің бүгіні мен болашағы» атты халықаралық ғылыми-теориялық конференция өтті.
Жиынға ҚР Президентінің кеңесшісі Мәлік Отарбаев, Тіл саясаты комитетінің төрағасы Әділбек Қаба, Еге университетінің (Түркия Республикасы) профессоры, филология ғылымдарының докторы Мұстафа Өнер, Философия, саясаттану және дінтану институтының бас ғылыми қызметкері Рүстем Қадыржанов, институт ғалымдары, тілтанушылар және онлайн форматта филологтар, мектеп мұғалімдері, журналистер қатысты.
«Мемлекеттік тілдің Ата заңымыз – Конституцияда бектілген рөлін сақтауға тиіспіз. Себебі ана тіліміз – ұлтымыздың діңгегі. Ел Президенті ҚР мемлекеттік тілі – қазақ тілі өз мәртебесінде үздіксіз әрі тұрақты түрде дамытуға, қоғамның барлық саласындағы қолданыс сапасын арттыруға жүйелі жағдай, ынталандыру жасау керек екенін үнемі айтып келеді. Қазақ тілін мемлекеттік тіл ретіндегі рөлін күшейтіп, ұлтаралық қатынас тіліне айналдыруды басты мақсатымыз деп санауымыз қажет», – деп атап өтті өз сөзінде Мәлік Отарбаев.
ҚР ҰҒА академигі, Ахмет Байтұрсынұлы атындағы Тіл білімі институтының бас ғылыми қызметкері Зейнеп Базарбаева «Жаңа Қазақстан: қазақ тіл ғылымының бүгіні мен болашағы» атты баяндама жасады. Тіл саясаты комитетінің төрағасы Әділбек Қаба мемлекеттік тіл саясаты, қазіргі ахуалы мен болашақ бағдары туралы сөз қозғады. Профессор Мұстафа Өнер жиынға онлайн қатысып, «Modern Toplumda Milli Kimlik ve Milli Dil» тақырыбында сөз сөйледі.
Жиын барысында ғалымдар, тілтанушылар Президент бастамаларын қолдау туралы ортақ түркі әліпбиі, латын әліпбиіне көшуді қолдау, «Мемлекеттік тіл туралы» Заң, тіл саясаты турасында пікір білдірді.
ҚР Ғылым және жоғары білім министрлігінің баспасөз қызметі