ҚММУ Бақылау кеңесінің отырысында №2 Қалалық аурухананы ЖОО сенімгерлік басқаруына беру ұсынысы қаралды
Денсаулық сақтау министрі Елжан Біртановтың Қарағанды облысына іссапары барысында жаңа құрамдағы ҚММУ Бақылау кеңесінің (БК) отырысы өтті. Іс-шараға Қазақстан Республикасы Парламент Мәжілісінің депутаты Нұрлан Дулатбеков, «Қарағанды облыстық денсаулық сақтау басқармасы» мемлекеттік мекемесінің басшысы Ержан Нұрлыбаев, Қарағанды мелекеттік медициналық университетінің ректоры Раушан Досмағамбетова, Қарағанды облысының Кәсіпкерлер палатасының Адами ресурстарды дамыту бойынша комитетінің төрағасы Елена Петренко, «Нұр Отан» партиясы Қарағанды қалалық филиалы төрағасының бірінші орынбасары Юлия Бадина, «Қарағанды облысы бойынша тәуелсіз медициналық сарапшылар Қауымдастығы» АҚ президенті Борис Зорин, ҚР ДСМ Еңбекті қорғау жөніндегі республикалық ғылыми–зерттеу институтының Қарағанды облыстық филиалының директоры Ертай Отаров қатысты.
Стратегиялық серіктестік жобасын жүзеге асыру шеңберінде Бақылау кеңесінің отырысында Лунд (Швеция) университетінің халықаралық сарапшысы Хуго Бражиони мырза қатысты.
Отырыстың күн тәртібінде БК төрағасын сайлауға қатысты сұрақтар, 2016 жылдың қаржы есебін алдын ала бекіту, 2016 жылға арналған Даму жоспарын орындау туралы есепті бекіту, 2016 жылдың қорытындысы бойынша кәсіпорынның иелігіндегі табыстан таза пайданы бөлу туралы шешім қабылдау, 2017-2021 жылдарға арналған түзетілген Даму жоспарын мақұлдау және уәкілетті органға (ҚР ДСМ) қорытындысын таныстыру, Бақылау кеңесінің 2016 жылдық жұмысы туралы есепті бекіту жөніндегі мәселелер қаралды.
Бақылау кеңесі отырысының қорытындысы бойынша БК төрағасы болып Денсаулық сақтау министрі Елжан Біртанов сайланды, төрағаның орынбасары болып Елена Петренко тағайындалды. Кеңестің жылдық қаржы есебі бекітіліп, 2016 жылға арналған Даму жоспарының орындалуы туралы есеп мақұлданды, сондай-ақ Бақылау кеңесінің 2016 жылға арналған жұмыс есебі бекітілді.
Сонымен қатар БК отырысында Бақылау кеңесінің мүшесі Ержан Нұрлыбаев күрделі жөндеуден кейін №2 Қалалық аурухананы ҚММУ сенімгерлік басқаруға өткізу туралы ұсыныс айтты. Осыған байланысты күн тәртібінен таза пайданы бөлу және 2017-2021 жылдарға арналған Даму жоспарын мақұлдау мәселелері алынды.
Қорытынды бойынша Кеңес мүшелерінің шешімімен аталған мәселелер БК келесі жоспардан тыс отырысында клиниканы университеттің сенімгерлік басқаруына беру туралы тұжырымдамасынан кейін қаралады.
ҚММУ Бақылау кеңесі ЖОО қаржы-экономикалық қызметтерінің маңызды бағыттарын жүзеге асырып, стратегиялық жоспардың жұмыс істеу жағдайына жүйелін талдау жүргізеді.
ҚР ДСМ Баспасөз қызметі