Нұр-Сұлтан қаласында электр скутерлерін жалға беру платформасы іске қосылды
«Astana Invest» ҚИДО» ЖШС мен «Jet Kazakhstan» компаниясы елорда тұрғындары мен қонақтарына арналған электр самокаттарды жалға беру платформасын іске қосты. Бұл елордадағы алғашқы самокаттарды жалға алу платформасы.
Самокаттарды жалға алудың жұмыс принципі – кез-келген қала тұрғыны стационарлық станцияда самокатты алып, қажетті мекен-жайға жетіп, оны жақын орналасқан кез-келген станцияда қалдыра алады.
Электр самокатты пайдалану үшін Jet мобильді қосымшасын жүктеп, телефон нөмірі бойынша тіркеліп, төлем жасау үшін банк картасын қосымшамен байланыстыру керек. Самокатты таңдап, QR-кодты сканерлеп, қолайлы тарифті таңдағасын, сапарды бастау қажет.
Қазіргі уақытта қаланың сол және оң жағалауында самокатты алуға немесе қалдыруға болатын 60-тан астам орын бар. Электр самокаттардың орналасқан орны, заряд дәрежесі туралы деректер JET қосымшасында болады. Сондай-ақ, таңдалған самокатты толығымен тегін брондау мүмкіндігі де бар.
Қазіргі уақытта қалада 100 самокат іске қосылды және алдағы уақытта олардың санын 1000 электросамокатқа дейін көбейту жоспарлануда.