Премьер-министрдің орынбасары Алтай Көлгінов пен Ғылым және білім министрі Саясат Нұрбек Алматыда жатақхана құрылысы бойынша құрылған жобалық кеңседе жоғары оқу орындары ректорларымен және инвесторлармен кездесті.

Наурыз айының басында ашылған жобалық кеңседе жаңа жатақханалар салу кезінде берілетін субсидиялардың жаңартылған тетіктері таныстырылды. Бүгінгі таңда жобалық кеңсеге 70-тен астам инвестор жүгініп, мамандардан кеңес алған.

Кездесуге қатысушылар жатақхана құрылысын іске асыру барысы мен проблемалық мәселелерді талқылады. Атап айтқанда, төсек-орындары аз жатақханалар үшін субсидиялауды енгізу, шекті 100-ден 50-ге дейін азайту және жатақханалар үшін ғимараттарды қайта салу кезінде мемлекеттік қолдау мөлшерін 92 АЕК-тен 230 АЕК-ке дейін арттыру ұсынылды.

Айта кетейік, Алматы қаласын дамытудың 2025 жылға дейінгі бағдарламасы аясында 12 мың төсек-орынға, ал 2030 жылға дейін тағы 20 мың орынға арналған жатақхана салу жоспарлануда.

Ары қарай делегация «Ғылым ордасына» барып, ғимаратта жүргізілетін күрделі жөндеу жұмыстары жоспарымен танысты. Биылғы жылдың сәуір айының аяғынан бастап Алматы қаласының жергілікті бюджеті есебінен «Ғылым ордасы» республикалық мемлекеттік кәсіпорнының ғимаратында күрделі жөндеу жұмыстары жүргізілетін болады.

Сондай-ақ, премьер-министрдің орынбасары мен министр әл-Фараби атындағы ҚазҰУ-дың ғылыми-техникалық инфрақұрылымымен танысты. Қонақтар алдымен Дәрілік өсімдіктерді ғылыми-зерттеу орталығына барып, дәрілік препараттар әзірлейтін құрылғыларды көрді. Бүгінде орталық соңғы үлгідегі құрылғылармен жабдықталған. Қазіргі таңда өндірісте тұмау мен бауыр ауруларынан сақтайтын және иммунитетті көтеретін, коронавирус инфекциясына қарсы биологиялық белсенді қоспалар дайындалады.

Алтай Көлгіновке ҚазҰУ-дың процестік инновациялар орталығында университет қабырғасында дайындалған «Al-Farabi-1» және «Al-Farabi 2» наноспутниктері туралық апарат берілді. Сонымен қатар мұндағы Жерді қашықтықтан зондтау орталығының жұмыс барысы баяндалып, білім беру мекемелерінде ғарыштық робототехника мен STEM білім беру жүйесін дамытуға арналған ALFASAT инновациялық конструкторы таныстырылды.

Жұмыс сапарының соңында вице-премьер Әл-Фараби мұражайымен танысып, ҚазҰУ-дың ғылыми-инновациялық жобалары мен факультеттердің жетістіктері қойылған көрмені тамашалады.