ҚР Парламент Мәжілісінің депутаттары «Қазақфильм» киностудиясының дубляждау жұмысымен танысты
1.11.2016.
Ш.Айманов атындағы «Қазақфильм» АҚ Қазақстан Республикасы Парламент Мәжілісінің депутаттары келді: дамыту комитетінің хатшысы Бейбіт Мамраев, әлеуметтік-мәдени дамыту комитетінің мүшелері Кәрібай Мұсырман және Жанат Омарбекова, Заңнама және сот-құқықтық реформа комитетінің мүшесі Снежанна Имашева, сондай-ақ, экономикалық реформалар және аймақтық даму комитетінің мүшесі Айзада Құрманова.
Кездесу барысында депутаттар киностудияның жұмысымен, оның жаңа жобаларымен және киноөндіріс процесімен танысты. Сондай-ақ қонақтар дубляждаудың барлық түрлері (актерлік дыбыстау, дикторлық дыбыстау, субтитрлау) және оған бөлінетін қаражат туралы ақпарат сұрады.
Цифрлық кешеннің қызметкерлері депутаттарға, 2010 жылы «Қазақфильм» киностудиясы технологиялық базасының жаңа модернизациядан өткені жайлы айтып берді. Атап айтқанда: өндірістің барлық кезеңдерінде жұмыс істеу үшін қажетті құрал-жабдықтармен (камералар, жарық түсіру және дыбыс техникасы, компьютерлер және т.б.) қамтамасыз етілгені, өндірістік алаңдардың (павильондар, цехтар, лабораториялар, фильмотека және т.б.) жөндеуден өткендігін жеткізді.
– Кеңестік кезеңде киностудия жылына 60-тан астам толықметражды фильмді дыбыстайтын. Біз қазір де қажетті заманауи техникамен жабдықталғанбыз, өндірістің барлық қызметін әлемдік деңгейге сәйкес көрсете аламыз. Десек те, киностудия ылғи да техникалық модернизациядан өтіп тұруы тиіс, – деді «Қазақфильм» киностудиясының аудиовизуалды жобалар жетекшісі Олжабай Мұсабеков.
Сондай-ақ, киностудия қызметкерлері дыбыстауға бөлінетін қаражат мәселесі жобаға байланысты әр түрлі болатынын, мысал ретінде, бір фильмді қазақ тіліне актерлік дыбыстау жасау үшін 10 млн. теңге көлемінде қаражат кететін айтты.
Кездесудің соңына қарай ҚР Парламент Мәжілісінің депутаттары лицензияланған Dolby қайтадыбыстау студиясын аралап, «28 панфиловшы» фильмінің қазақ тіліне дыбысталу жұмысына куә болды.
Естеріңізге сала кетсек, өткен аптада ҚР Парламент Мәжілісінің жұмыс тобы өткізген отырысында «Қазақстан Республикасының мәдениет мәселелеріне қатысты бірқатар заң актілеріне өзгертулер мен қосымшалар жасау туралы» депутаттық заң жобасы қаралған болатын. Депутаттар, кино мен театр саласының мамандары, азаматтық қоғам және саяси партиялар өкілдері еліміздің әдебиет және кино, театр, музейлерінің жұмыс істеу барысы жайлы өзгертулер жайын талқылады. Осы орайда 2017 жылдың 1 қаңтарынан бастап Қазақстанға әкелінген барлық фильмдердің қазақ тіліне дыбысталу мәселесі талас тудырған болатын.
Анықтама: Ш. Айманов атындағы «Қазақфильм» АҚ – Көркем, деректі, анимациялық кино өндірісі мен өндірістен кейінгі кезеңде тұрған өнімдермен (оның ішінде монтаждау, дыбыстау, т.б.) айналысатын Қазақстандағы негізгі кинокомпания. Ш.Айманов атындағы «Қазақфильм» киностудиясының тарихы 1934 жылдан бастау алады, дәл осы жылы Алматы кинохроника студиясы құрылды, ал 1941 жылы Алматы көркем фильмдер студиясы деп өзгертіліп, киностудияның өндірістік негізі барынша нығая түсті. 1941 жылы 15 қарашада Алматы киностудиясы Қазақстанға эвакуацияланған «Мосфильм және «Ленфильм» киностудияларымен бірлесіп, Бірлескен Орталық киностудия болып қайта құрылып, Алматыда 1944 жылғы дейін жұмыс істеді. Соғыс жылдары кезеңінде отандық көркем фильмдердің 80 пайызын аталмыш Орталық киностудия шығарды. 1960 жылы «Қазақфильм» атауына ие болды. 1984 жылы киностудияға ұлттық кинематогрфияның көрнекті қайраткері Шәкен Аймановтың есімі берілді.