Қала күні қарсаңында Алматы музейінде П.И. Шороховтың «Алматыма арнау» атты көрмесі ашылды.
Павел Иванович Шорохов – қала көшелерін көркемдеуге арналған мүсіндеу шебері.
Ол 1946 жылы Латвияда дүниеге келіп, 11 жасында Қазақстанға қоныс аударған. Н.В. Гоголь атындағы Алматы көркемөнер училищесін тамамдаған ол 70-жылдардың ортасынан бастап мүсін өнерімен айналыса бастайды. Алғашқы жұмыстарын табиғи иілгіш материал ағаштан жасауы шеберге «Ананың портреті», «Скоморох», «Кручина», «Сольвейг», т.с.с. композициялық туындыларды дүниеге әкелуге мүмкіндік берді. Ал кейінірек шеберлігін шыңдаған соң өз шығармашылық идеяларын керамика, мыс, қола, алюминий, гранит, мәрмәр секілді пластикалық шеберлік құралдарын қолдана отырып орындай бастады.
Мүсінші өз жұмыстарымен қаламызды сан жылдар бойы безендіріп келеді. Павел Шороховтың айшықты мүсіндік туындыларының бірі кезіндегі Ленин даңғылындағы (қазіргі Достық даңғылы) «Малыш» дүкенінің алдында орналасқан «Айсты» мүсіні болатын. Оның сюжетінің орталығында – сәбиді сүйемелдеп тұрған екі қанатты құс бейнеленген. Павел Шороховты шығармашылық өкілдері арасында алманың Әкесі деп атайды, себебі шебер қаламыздың басты символының образын жасаған.
1978 жылы П. Шорохов ең алғашқы саябақтарға арналған жұмысы – «Балалық шақ» мүсінін жасады. Осыдан кейін саябақ мүсіндемесі оның шығармашылығының басты тақырыбына айналады. 1980 жылы С. Шариповтың алғашқы монументалдық ескерткіші көтерілді.
Ол материалда тұлғалық ерекшелікті айқын бейнелеудің хас шебері. Мүсінші өз қолынан шыққан рельефтік портреттер, монументалдық бюсттер, қабырүсті ескерткіштері, портреттік мемориалдық тақталарда атақты ғалымдар, әдебиетшілер, академиктер, композиторлар, әскери және саяси тұлғалардың мінез-құлқын психолог секілді тамаша жеткізе білген. Бейнеленген тұлғалар ішінде М. Ғабдуллин, А. Сызғанов, Ғ. Орманов, Ғ. Мұстафин, Е. Кручинский, Ю. Рудковский, І. Есенберлин, Қ. Сәтбаев, М. Әуезов, Ж. Жабаев, Д. Қонаев, Ғ. Мүсірепов және т.с.с. атауға болады.
Павел Шороховтың жұмыстары әлемнің көптеген музейлерінің қорларында, Қазақстан, Ресей, Франция, Германия, Италия, Австрияның жеке коллекцияларында сақтаулы. Павел Шороховтың шығармашылық мұрасының географиясы айтарлықтай ауқымды – Алматы және Нұр-Сұлтан, Арқалық және Балқаш, Талғар және Павлодар, Ақтау, алыс және жақын шетелдер.