ENACTUS KAZAKHSTAN NATIONAL COMPETITION 2023 ҰЛТТЫҚ КУБОГЫНЫҢ ЖЕҢІМПАЗДАРЫ
Астанада Студенттік кәсіпкерліктің, стартаптар мен инновациялардың Ұлттық кубогы, сондай-ақ ENACTUS KAZAKHSTAN NATIONAL EXPO 2023 мектеп кәсіпкерлігінің IV Республикалық чемпионаты аяқталды.
ENACTUS мектеп және студенттік кәсіпкерліктің ұлттық жарысына 100-ден астам команда жиналды. Оқу жылы бойы командалар әлеуметтік-кәсіпкерлік, экологиялық және инновациялық жобалармен жұмыс істеді.
ENACTUS KAZAKHSTAN студенттік кәсіпкерліктің ұлттық чемпионы Академик Е. А. Бөкетов атындағы университеттің Enactus Buketov University командасы болды. Ұлттық чемпион атағымен бірге команда 2023 жылы Нидерландыда өтетін ENACTUS World Cup чемпионатында Қазақстанның намысын қорғау құқығын жеңіп алды. Early Stage Competition лигасында (дамудың бастапқы кезеңіндегі жобалар) Манаш Қозыбаев атындағы Солтүстік Қазақстан мемлекеттік университетінің ENACTUS командасы жеңіске жетті.
Биыл жарысқа Қазақстанның 17 өңірінен 40 студенттік және 70 мектеп командасы қатысты.
Іс-шарада ҚР Премьер-Министрінің орынбасары Алтай Көлгінов; ҚР Ғылым және жоғары білім министрі Саясат Нұрбек; «Атамекен» ҰКП Президиумының төрағасы, ENACTUS KAZAKHSTAN директорлар кеңесінің төрағасы Райымбек Баталов; ҚР Мәдениет және спорт вице-министрі Ержан Еркінбаев; Астана қаласы әкімінің орынбасары Ерлан Бекмырзаев; ҚР Парламенті Мәжілісінің депутаты, Respublica партиясының төрағасы Айдарбек Ходжаназаров; ENACTUS Global вице-президенттері Elgar Beumer мен Amy Englert, даму жөніндегі директоры Tiffany Armstrong және тағы да басқа спикерлер сөз сөйледі.
«Мен ұлттық кубокқа болашақ бизнес көшбасшыларының жас буынын қолдау және олардың бастамаларында сәттілік тілеу үшін келдім! Сондай-ақ, мен 2024 жылы ENACTUS әлем чемпионатын өткізуге берілген өтінімге байланысты ENACTUS Kazakhstan Ұлттық кеңсесін қолдаймын», – деді Саясат Нұрбек.
Атап өтсек, ENACTUS халықаралық бағдарламасы 45 жылдан астам уақыт бойы әлемнің 33 елінде студенттік кәсіпкерлікті дамытып келеді. Бизнес-жобаларды іске асыру жөніндегі жастар бастамаларын дәстүрлі түрде халықаралық компаниялардың ірі басшылары қолдайды. Жыл сайын бұл бағдарламаға 1 800 университет, 72 000-нан астам қатысушы қатысады.