Е. Ыдырысов және Б. Джонсон Лондонда Қазақстан-британ стратегиялық диалогты өткізді
2016 ж. 6 қазанда басталған Лондонға екі күндік жұмыс сапары шеңберінде Қазақстан Сыртқы істер министрі Ерлан Ыдырысовтың британдық әріптесі Борис Джонсонмен бірге Қазақ-британ стратегиялық диалог бойынша кездесу өткізіп, алдағы кезеңде өтетін «ЭКСПО-2017» көрмесінің Ұлыбритания ұлттық павильоны жобасының таныстырылымына қатысты.
Британ сыртқы саяси ведомствосында кездесу барысында Е. Ыдырысов және Б. Джонсон Қазақстан мен Ұлыбритания арасындағы ынтымақтастықтың екіжақты және көпжақты форматтағы негізгі қырларын талқылады, сондай-ақ Қазақстан БҰҰ-ның Қауіпсіздік Кеңесінің 2017-2018 жылдар аралығындағы тұрақты емес мүшесі болып сайлануының мәнмәтінде халықаралық күн тәртібіндегі өзекті мәселелер бойынша пікірлерімен алмасты. Қамтылған тақырыптар арасында Сирия мен Ауғанстандағы ахуал, Украинадағы жағдайды реттеу бойынша Минск уағдаластықтарды іске асыру мәселелері, терроризмге қарсы күрес, жаппай қырып-жоятын қаруды таратпау, Орталық Азиядағы өңірлік ынтымақтастық және басқа да тақырыптар талқыланды.
Келіссөздер барысында сыртқы істер министрлері екі ел арасындағы экономикалық және саяси ынтымақтастықтың даму серпінін, сондай-ақ Астана мен Лондон арасындағы стратегиялық әріптестіктің өсіп келе жатқан деңгейін атап өтті. Осыған дәлел жуырда өткен Ханчжоу қаласындағы (Қытай) «Үлкен жиырмалық» саммиті шеңберіндегі Қазақстан Президенті Нұрсұлтан Назарбаевтың Ұлыбритания Премьер-министрі Тереза Мэймен кездесуі болып табылады. Дипломаттар 2015 жылғы қарашада Лондонда Қазақстан Президентінің ресми сапары кезінде қол жеткізілген уағдаластықтарды іске асыру мәселелерін де талқылады.
Келіссөздердің қорытындысы бойынша екі елдің министрлері екіжақты ынтымақтастықтың барлық бағыттары бойынша қарым-қатынастарды жоғары деңгейде қолдау мен мүдделерін растап, бірлескен мәлімдеме қабылдады.
Сол күні Е. Ыдырысов Астанада өтетін «ЭКСПО-2017» көрмесіндегі британ ұлттық павильоны жобасының таныстырылымына қатысты. Ұлыбритания халықаралық сауда министірлігінде өткен іс-шараға британ Сыртқы істер министірлігі өкілдері, көрмеге қатысуға өз қызығушылықтарын танытқан 20-ға жуық британ компания басшылары және БАҚ өкілдері қатысты. Ұлыбритания павильоны жобасын «ЭКСПО-2017» Ұлыбритания Комиссары Чарльз Хендри және танымал британдық сәулетші А. Хан ұсынды.
Таныстырылым қатысушыларының жалпы пікірі бойынша, Ұлыбритания павильоны Қазақстан елордасында өтетін көрмеде айырықша қызықты болатынына сенім білдірді, сонымен қатар ол озық технологиялар мен жаңартылатын энергия көздері салаларындағы перспективалық ғылыми әзірлемелер алмасуына ықпал ететінін атап өтті.