Бүгін ДДҰ-ның Астанадағы Еуропалық өңірлік комитетінің 73-ші отырысының шеңберінде Денсаулық сақтау министрі Ажар Ғиният Украина, Швеция, Әзірбайжан, Түркия, Румынияның бейінді ведомстволарының басшыларымен бірқатар кездесулер өткізді.

А. Ғиниятпен бірінші кездесудің барысында Украина Денсаулық сақтау министрінің орынбасары Сергей Дубров барлық қазақстандықтарға гуманитарлық көмек көрсеткені, осындай іс-шараны ұйымдастырғаны үшін алғысын білдірді.

Украиналық тарап озық технологияларда, медицинада тәжірибе алмасуға, сондай-ақ Қазақстандағы украин балаларын оңалту мүмкіндіктеріне қызығушылық танытты.

ҚР Денсаулық сақтау министрлігінің басшысы бұл бастаманы қолдап, еліміздегі балаларды оңалту орталықтарының жоғары деңгейін атап өтті.

А. Ғиниятпен кездесу барысында Швецияның Денсаулық сақтау министрі Лена Халленгрен саланы қаржыландыру мәселелерін қозғады.

«Кеше тұсаукесер шеңберінде МСАК-қа қатысты өте әсерлі көрсеткіш айтылды және Швеция үшін бұл сабақ, өйткені бізде МСАК-ты қаржыландыру үлесі 20%-ды құрайды. Мұнда сіз біздің алдымызда тұрсыз және Қазақстаннан үйренетін көп нәрсе бар», – деді Шведция министрі.

«МСАК дамыту біздің стратегиямыздың негізгі функциясы болып табылады. Біз де стационарларға, ауруханаларға көбірек инвестиция салдық және бұл бюджеттен үнемі үлкен инвестицияларды қажет ететінін көрдік. Содан кейін, 10 жыл бұрын, біз өзіміз үшін профилактикаға, амбулаториялық-емханалық көмекке және барлық қымбат қызметтерге, әсіресе клиникалық-диагностикалық қызметтерді амбулаториялық-емханалық деңгейде көрсету керек деп шештік. Содан кейін аурухананың ауыр жағдайлары азаяды. Осындай индикаторлар бойынша біз қозғаламыз», – деп түсіндірді Ажар Ғиният.

Швед тарапы ауылдық денсаулық сақтау жобасын іске асыруға, онкологиялық көмек көрсету бағытында, цифрлық шешімдерді кеңінен енгізуге қолдау көрсетуге дайын екенін білдірді.

«Біздің еліміз үлкен, сондықтан біз жергілікті жерлерде медициналық ұйымдар құрамыз, көлік медицинасын қолданамыз. Жылжымалы емханалар, жылжымалы маммографтар, томографтар, КТ және т.б. мұның бәрі бізде дамып келеді. Ал қазір біз қашықтықтан медицинаға, телемедицинаға баса назар аудардық, сондай-ақ мұның сіздерде қалай жүзеге асырылып жатқанын білуге, сіздің алаңдарыңызбен танысуға мүдделіміз», – деп түйіндеді Қазақстан Денсаулық сақтау министрлігінің басшысы.

Ажар Ғиният Түркия Денсаулық сақтау министрінің орынбасары Толга Толунаймен кездесу барысында МСАК-ты дамытудағы екіжақты ынтымақтастық, онкологиялық көмек саласында қолдау көрсету мәселелері талқыланды.

«Кейде біз денсаулық сақтау мен білім берудің сапалы қызметтеріне тең емес қолжетімділікпен қиындықтарға тап боламыз. Қаржылық қамтамасыз ету осы міндеттерді шешуде шешуші рөл атқарады. МСАК – бұл мәселелерді шешудің ең күшті құралы»,-деді Түркияның Денсаулық сақтау вице-министрі.

Ол осы салаларда Қазақстанмен тығыз ынтымақтастыққа дайын екенін білдіріп, өңірлік комитеттің 73-ші сессиясы баршамыз үшін оң нәтиже беретінін атап өтті.

Өз кезегінде Денсаулық сақтау министрі Ажар Ғиният Түркияның Қазақстан үшін бауырлас ел екендігіне және мемлекеттердің арасындағы екіжақты ынтымақтастық белсенді түрде жалғасатынына сендірді.

Бұдан әрі Қазақстан Денсаулық сақтау министрлігінің басшысы Әзірбайжан және Румыния ведомстволарының басшылары Мұсаев Теймурмен және Рафила Александрумен медициналық кадрларды оқыту мәселелерін талқылады. Тараптар осы бағытта тәжірибе алмасуға және ынтымақтасуға уағдаласты.