ҒЫЛЫМ ЖӘНЕ ЖОҒАРЫ БІЛІМ МИНИСТРЛІГІНІҢ ДЕЛЕГАЦИЯСЫ ПӘКІСТАНДА БІРҚАТАР КЕЗДЕСУЛЕР ӨТКІЗДІ
Астана қ. 05.12.2022 ж.
Исламабад қаласында өткен «Ислам ынтымақтастық ұйымы – 15 диалог алаңына» ұйымға қатысушы 15 елдің және ИЫҰ ғылыми-техникалық ынтымақтастық жөніндегі тұрақты комитетінің (COMSTECH) 2 ұйымының өкілдері қатысты. Іс-шара барысында білім, ғылым және технологиялар мәселелеріне жауап беретін ИЫҰ елдерінің сыртқы істер министрлерінің 2023 жылы Астанада өтетін алғашқы кездесуі талқыланды.
Басқосу барысында ҚР Ғылым және жоғары білім министрлігі, Ғылым комитетінің төрағасы Дархан Ахмед-Заки Мемлекет басшысының Президент жанында Ғылым және технологиялар жөніндегі ұлттық кеңесті құру бастамасы жөнінде хабардар етті. Сондай-ақ отандық ғылымның болашағы мен мүмкіндіктері және осы салада жүргізіліп жатқан реформалар жөнінде айтып берді.
Кездесу қорытындысы бойынша одан әрі өзара іс-қимыл жасау үшін бағыттарды айқындау мақсатында, онлайн-келіссөздер жүргізуге барлық мүдделі тараптарды шақыра отырып, келесі жылдың басында жиын өткізу туралы уағдаластыққа қол жеткізілді.
Естеріңізге сала кетсек, «ИЫҰ – 15 диалог алаңы» ғылым және технологиялар саласындағы 15 жетекші елді (Малайзия, Түркия, БАӘ, Тунис, Иран, Сауд Арабиясы, Марокко, Индонезия, Қазақстан, Египет, Иордания, Пәкістан, Қатар, Ливан, Әзірбайжан) біріктіретін консультативтік-кеңесші тетік болып табылады.
ҚР Ғылым және жоғары білім министрлігінің баспасөз қызметі