Елбасының қола медалінің алғашқы иелерінің есімдері белгілі болды
Нұрсұлтан Назарбаев қорында «Елбасы» медалі бағдарламасының қатысушыларын марапаттау жөніндегі комиссияның алғашқы отырысы өтті. Комиссия құрамына Нұрсұлтан Назарбаев қорының, «Елбасы академиясы» корпоративтік қорының, Қазақстан Республикасы Ақпараттық және әлеуметтік даму министрлігінің, Қазақстан Республикасы Білім және ғылым министрлігінің, Қазақстан Жастар Конгресінің, бұқаралық ақпарат құралдарының және ата-аналар қауымдастығының өкілдері кірді.
Комиссия барлық бағыттар бойынша тапсырмаларды сәтті орындаған қатысушылардың алғашқы легінің нәтижелерін қарады. Кездесу қорытындысы бойынша 1000 қатысушыны 2020 жылы Елбасының қола медалдарымен марапаттау туралы шешім қабылданды. Қазіргі уақытта тағы 7 мың жас қазақстандық бағдарламаның қола деңгейінде қатысуды жалғастыруда.
Еске салайық, «Елбасы» медалі – бұл жастардың жан-жақты дамуына бағытталған ұлттық деңгейдегі жалғыз бағдарлама. Ол негізгі 7 бағыттан тұрады: спорт, дарындар мен дағдылар, кітап оқу, ұлттық мұра, еріктілер, экспедициялар мен жорықтар, еңбек практикасы. Бағдарламаға 14 пен 29 жас аралығындағы жас қазақстандықтар қатысады.
Қазіргі уақытта жобаға 11 мыңнан астам қатысушылар, 600 тәлімгерлер, 17 аймақтық үйлестірушілер мен сарапшылар кіреді.