Сенат еңбек заңнамасына енгізілетін түзетулерді қабылдады
ҚР Парламенті Сенатының депутаттары пленарлық отырыста «Қазақстан Республикасының кейбір заңнамалық актілеріне еңбек мәселелері бойынша өзгерістер мен толықтырулар енгізу туралы» заңды екі оқылымда қарап, қабылдады деп, ҚР Еңбек және халықты әлеуметтік қорғау министрлігінің баспасөз қызметі хабарлайды.
Осы Заң еңбек қатынастары, әлеуметтік әріптестік, еңбек қауіпсіздігі және еңбекті қорғау мәселелерін қамтиды.
Осылайша, еңбек жағдайлары бойынша қызметкерлерді кемсіту фактілеріне жол бермеу мақсатында құжатта: Еңбек кодексінде қызметкердің лайықты еңбек және тұрмыс жағдайларына құқығы туралы нормаларды белгілеу, еңбек саласында кемсітушілік фактілеріне жол бергені үшін жұмыс берушілерді жауапкершілікке тарту үшін әкімшілік заңнамаға негіздеме енгізу көзделеді.
Бұдан басқа, жұмыс берушінің жалақысы сақталмайтын демалыс беру жолымен мерзімді әскери қызмет өткеріп жүрген қызметкерлердің жұмыс орнын сақтап қалу міндеті бекітіледі. Бұл ретте қызметкердің әскери бөлім тізімінен шығарылған күннен бастап бір ай ішінде өзінің еңбек функцияларына кірісу міндеті бекітіледі.
Сонымен қатар, отбасының науқас мүшесіне күтім жасайтын жұмыскерлерге толық емес жұмыс уақыты режиміне құқық берілетін болады. Бұл шара қызметкерлерге еңбек қызметін жеке және отбасылық қажеттіліктерімен және міндеттерімен қатар алып жүруге мүмкіндік береді.
Кадрлық іс жүргізуді цифрландыру мақсатында жұмыс берушінің еңбек шартында көзделген жұмыскердің еңбек қызметі туралы ақпаратты Еңбек шарттарын есепке алудың бірыңғай жүйесіне (бұдан әрі – жүйе) беруі көзделген. Қазіргі уақытта ҚР Еңбекмині пилоттық жобаны іске асыруда, оның шеңберінде 28 мың ұйым 1,3 млн. еңбек шарты туралы мәліметтерді жүйеге енгізді.
Келіссөздер жүргізу және ұжымдық шарттарға қол қою барысында барлық жұмыскерлердің пікірін ескеру мақсатында кәсіподақ мүшелері болып табылмайтын қызметкерлердің мүдделерін білдіру бойынша сайланбалы өкілдердің өкілеттіктері бекітілді. Бұл ретте, заңнамаға ұйымның тек бір ұжымдық шарт жасай алатыны туралы нақтылаушы норма енгізілуде.
Әлеуметтік әріптестікті реттеу саласында кәсіподақтардың қызметіне байланысты Халықаралық еңбек ұйымының ұсынымдарын орындау мақсатында мыналар көзделген: кәсіподақтардың жоғары тұрған кәсіподақ бірлестіктеріне міндетті мүшелігін алып тастау, бұл кәсіподақтардың бірлесу еркіндігіне құқығын шектемеуге мүмкіндік береді; кәсіподақтар республикалық, салалық, өңірлік бірлестіктер ретінде мемлекеттік тіркелген кезде олардың кәсіподақ мәртебесін растау шарттарын оңайлату. Осыған байланысты салалық кәсіподақтар үшін сала және онымен байланысты салалар қызметкерлерінің жалпы санының кемінде жартысын біріктіруі туралы талап алынып тасталады, кәсіподақтар бірлестігін әділет органдарында тіркеген кезде мәртебесін растау мерзімдері 6 айдан 1 жылға дейін ұлғаяды.
Сондай-ақ Заңда жұмыс берушілерге, жұмыскерлерге және еңбек жөніндегі уәкілетті органға еңбекті қорғауды басқару жүйесін енгізу және оның жұмыс істеуі жөніндегі талаптарды бекіту көзделеді.
Жұмыс берушілердің «Еңбекті қорғау» бірыңғай ақпараттық жүйесін пайдалана отырып, өндірістік объектілерді еңбек жағдайлары бойынша аттестаттау нәтижелерін және жұмыс берушінің қызметкерлердің еңбек құқықтарын сақтау жөніндегі қызметін декларациялау үшін мәліметтерді электрондық форматта беру тетігі енгізілуде.
Бірнеше ұйым бір уақытта түрлі жұмыстарды жүргізген жағдайда, еңбекті қорғау талаптарының сақталуын жалпы үйлестіруді бас мердігерге бекіту қарастырылады. Бұл шара өндірістегі жазатайым оқиғаларды болдырмау мақсатында еңбекті қорғау қызметінің жұмысын үйлестіруге мүмкіндік береді.
Заңды іске асыру республикалық бюджеттен қосымша қаржы шығындарын талап етпейді және теріс әлеуметтік-экономикалық немесе құқықтық салдарға әкеп соқпайды.