Іс-шараға Қазақстан премьер-Министрінің орынбасары Тамара Дүйсенова, ҚР Ғылым және жоғары білім министрі Саясат Нұрбек, Ақтөбе облысының әкімі Асхат Шахаров және Heriot-Watt университетінің ректоры Марк Бигс қатысты.

Қасым-Жомарт Тоқаевқа университеттің ғылыми жетістіктері, «Электр энергетикасы», «Компьютерлік инженерия», «Мұнай-газ ісі» және «Энергоменеджмент» сияқты жаңа білім беру бағдарламалары таныстырылды.

Өңірде Heriot-Watt жетекші техникалық университетінің филиалының ашылуы Қазақстанның түкпір-түкпірінен және шет елдерден келген студенттердің бірігуіне ықпал етеді. Мәселен, қазір университеттің факультетінде еліміздің 9 өңірінен 300 студент оқиды.

ҚР Ғылым және жоғары білім министрі Саясат Нұрбек өз сөзінде Heriot-Watt университетімен әріптестіктің басты мақсаты – халықаралық стандарттарға сәйкес білім беру сапасын арттыру және батыс өңірі үшін мықты кадрлар даярлау екенін атап өтті.

Қ. Жұбанов атындағы Ақтөбе өңірлік университетінің ректоры Лаура Қарабасованың айтуынша, қазір оқу орны инженерлік кадрларды даярлаудың жаңа кезеңіне өтті. Жоғары білім беруді жетілдіру және білімді әлемдік білім беру кеңістігіне экспорттау жолында үлкен жұмыс жүріп жатыр.

Президенттің Жолдауы негізінде Heriot-Watt университетімен маңызды келісімге қол жеткізілді, ол әлемдегі ең үздік 250 жоғары оқу орындарының тізіміне кіреді. Жолдауда айтылғандай, жаңа IT-технологияларды енгізу осы саладағы мамандарды даярлаумен қатар жүруі тиіс. Осыны ескере отырып, түскен 300 студенттің 160 студентін Ақтөбелік филиал IT-мамандық бойынша дайындауда.

Осы оқу жылынан бастап аталған оқу орнының филиалына түскендердің арасында еліміздің 9 өңірінен келген студенттердің 35%-ы ауылдық мектептердің түлектері және 42%-ы қолдауға мұқтаж түрлі әлеуметтік санаттардан.

Грантты жеңіп алған талапкерлердің арасында тек ақтөбеліктер ғана емес, Батыс Қазақстан, Маңғыстау, Қызылорда, Ақмола, Атырау, Жетісу облыстарының, сондай-ақ Астана және Алматы қалаларының түлектері де бар.

Британдық Heriot-Watt жоғары оқу орнының филиалына түскен студенттердің жатын орнына қатысты мәселелер толығымен шешілді. Жұбанов университеті үшін студенттерге әлеуметтік қолдау көрсету басымдыққа ие, сондықтан студенттік жатақханаларда тұруға барлық жағдай жасалған.

Студенттер жаңа жатақханадан бөлмелер алды. Жұбанов университетінде жалпы сыйымдылығы 2200 адам болатын 4 жатақхана бар.

Мемлекет басшысы Heriot-Watt студенттерімен әңгімелесіп, оларға оқуда табыс тіледі.

Әңгімелесу барысында ЖОО оқушылары шетелдік бағдарламаларды оқып, халықаралық стандарттар бойынша қос диплом алу мүмкіндігі үшін Президентке алғыстарын білдірді.

Филиалдың белсенді студенті Алексей Высоцкий үздік шетелдік университеттер филиалдарының ашылуы жастарды ғылыми-техникалық прогреске ынталандыратынын атап өтті.

«Оқу процесі күрделі болса да, біз жақсы және сапалы білім алу үшін қолдан келгеннің бәрін жасаймыз. Біз алған білімімізді еліміздің жарқын болашағы үшін пайдалануға дайынбыз!»,- деп бөлісті Алексей.