Денсаулық сақтау министрлігінде халықты COVID-19-дан вакцинациялауға дайындықты қамтамасыз ету мәселелері талқыланды
Бүгін ҚР Денсаулық сақтау вице-министрі – Бас мемлекеттік санитарлық дәрігер Ерлан Қиясов Қазақстан, Қырғызстан, Ресей Федерациясы, Тәжікстан, Түрікменстан және Өзбекстанның денсаулық сақтау министрлеріне арналған ДДСҰ Еуропалық аймақтық бюросының COVID-19 пандемиясының қазіргі жағдайын талқылау бойынша өткен басқосуға қатысты. Жиын барысында COVID-19 вакциналарын тарату мен қамтамасыз ету және вакцинациялауды жүзеге асыру мәселелері қаралды.
«Қазіргі таңда Қазақстандағы эпидемиологиялық ахуал тұрақтанып келеді. Жаңа коронавирус инфекциясының таралуын болдырмау үшін профилактикалық шаралар кешені жүргізілуде. Бүгінгі күні көптеген елдер, соның ішінде Қазақстан жаңа коронавирус инфекциясының таралуын болдырмау, соның ішінде COVID-19-ға қарсы вакциналар жасау бойынша белсенді жұмыс жүргізуде », – деді Қиясов.
Бүгінгі таңда клиникалық зерттеулердің III кезеңінде тұрған бірнеше үміткер бар. Олардың жағдайы жіті бақылауда.
«КВИ-ге қарсы алғашқы вакцинаны жасау мен тіркеудің сәтті тәжірибесін ескере отырып, ҚР Денсаулық сақтау министрлігі мен Ресейдің тікелей инвестициялар қоры арасында ынтымақтастық туралы келісімге қол қойылды, соған сәйкес Ресей Федерациясы «Спутник V» вакцинасын Қазақстан аумағында өндіруге арналған технологиялық трансферді, кемінде 2 млн доза вакцина өндіруге субстанция береді. Бұл мәселе ресейлік мамандармен егжей-тегжейлі пысықталуда», – деді вице-министр.
Ағымдағы жылдың маусым айында Жамбыл облысында ҚР БҒМ Ғылым комитетінің Биологиялық қауіпсіздік проблемалары ҒЗИ жанынан қуаты 60 миллион дозаға дейін вакцина өндіретін биофармацевтикалық препараттар шығаратын зауыттың құрылысы басталды. Қазақстандық ғалымдар COVID-19-ға қарсы вакцина әзірледі, ол ДДСҰ тізіміне енген және клиникалық сынақтардан сәтті өтуде.
Мемлекет басшысы Қасым-Жомарт Тоқаевтың тапсырмасы бойынша халықтың қосымша әлеуметтік осал топтарын қоса алғанда, вакцинациялауға жататын азаматтар контингенті кеңейтілетін болады. Қазіргі уақытта КВИ-ға қарсы әзірленген вакциналардың ерекшеліктерін ескере отырып, вакцинациялау тактикасы мәселелерін қамтитын коронавирус инфекциясына қарсы вакцинациялауды ұйымдастыру және жүргізу жөніндегі жоспарды дайындау жұмыстары жүргізілуде. Осы жоспарға сәйкес КВИ-ға қарсы вакцинация жоспарлы профилактикалық егулерді жүргізетін медициналық ұйымдардың қолданыстағы егу кабинеттері базасында жасалады. Халықты коронавирус инфекциясына қарсы вакцинациялаудың басталғаны туралы хабардар ету клиникалық зерттеулердің барлық кезеңдері аяқталғаннан, вакциналардың қауіпсіздігі мен тиімділігі туралы толық деректер нақтыланғаннан және вакцинаны елге жеткізу күні анықталғаннан кейін басталады.
«Бұл мәселеде халықаралық ұйымдар – ДДСҰ мен ЮНИСЕФ тарапынан әдістемелік қолдау күтеміз», – деді вице-министр.
Кездесу соңында Е.Қиясов Дүниежүзілік денсаулық сақтау ұйымының Еуропалық өңірлік бюросына және COVID-19-дың әлемде таралуына қарсы күресте және оны алдын-алуда жетекші рөл атқарып отырғаны үшін ризашылығын білдірді.