ЕАЭО шеңберінде бағалы металдармен және тастармен операцияларды жүзеге асыру ерекшеліктері туралы келісімді ратификациялау туралы
“Еуразиялық экономикалық одақ шеңберінде бағалы металдармен және асыл тастармен операцияларды жүзеге асыру ерекшеліктері туралы келісімді ратификациялау туралы” заң жобасын бүгін ҚР Парламенті Мәжілісінің қарауына ҚР Индустрия және инфрақұрылымдық даму министрі Бейбіт Атамқұлов ұсынды.
Келісім Еуразиялық экономикалық одаққа мүше мемлекеттердің бәсекелестік артықшылықтарын құруға, Одақ шеңберінде бағалы металдар мен тастардың еркін айналымы үшін жағдай жасауға, сондай-ақ осы салада тиімді шаралар әзірлеу үшін өзара іс-қимыл жасауға бағдарланған өзара тиімді сауда-экономикалық тетіктерді қалыптастыруға бағытталған.
Келісім 18 баптан тұрады және:
– бағалы металдармен, өңделмеген асыл тастармен мәмілелерді жүзеге асыру;
– Кимберлий процесінің талаптарына сәйкес мүше мемлекеттер арасында өңделмеген табиғи алмастардың тасымалдануы;
– мәмілелер жасау және асыл тастардың сыныптамалық және құндық сипаттамаларын анықтау;
– заңды тұлғалар мен жеке кәсіпкерлерде түзілетін сынықтар мен қалдықтарды жинау және міндетті есепке алу;
– ЕАЭО ішінде әкелінген немесе өндірілген зергерлік және басқа да бұйымдарды сынамалау, талдау және таңбалау;
– заңнамалық және өзге де нормативтік құқықтық актілер және уәкілетті органдар арасындағы сынамалық таңбалар бедерлерінің үлгілері туралы ақпарат алмасу;
– бағалы металдар мен асыл тастардың заңсыз айналымы үшін жауапкершілік шараларын қолдану.
Келісімде зергерлік бұйымдармен өзара саудада ЕАЭО-ға мүше мемлекеттердің сынамалық таңбаларын өзара тану бекітіледі. Егер зергерлік бұйым Қазақстан аумағында дайындалса және сынақтан өткізілсе, бұл бұйымды Одаққа елдерінде өткізу кезінде қайта сынамалау талап етілмейді.
Сондай-ақ, Келісім ұлттық және мемлекетаралық сапа стандарттарының талаптарын мойындайды және қатысушы мемлекеттерде өндірілетін алтынды сатып алуға басым құқығын бекітеді.
Жалпы, Келісім нормалары ЕАЭО елдері аумағында бағалы металдармен және тастармен операциялардың толық есебін жүргізуге және сыбайлас жемқорлыққа қарсы іс-қимыл жасауға мүмкіндік береді.
Еуразиялық экономикалық одақ шеңберінде бағалы металдармен және асыл тастармен операцияларды жүзеге асыру ерекшеліктері туралы келісімге ЕАЭО-ға қатысушы елдер 2019 жылғы 22 қарашада Мәскеуде қол қойды.
Бүгінгі таңда Беларусь пен Ресей Келісімнің күшіне ену шараларын аяқтады. Армения мен Қырғызстанда жоба Парламенттерінің қарауында жатыр.
Анықтама үшін:
Кимберли процесі 82 елді біріктіреді. Ұйым 2003 жылы “қанды алмас” деп аталатын заңсыз өндірілген асыл тастармен күресу аясында құрылды. Оны сатудан түскен қаражат аймақтық қақтығыстар мен террористік топтарды қаржыландыруға жұмсалып келген.
Кимберли процесіне қатысушы әрбір ел шикі алмастардың бірде-бір партиясы қатыспайтын тарапқа импортталмайтынына және экспортталмайтынына кепілдік береді.
ЕАЭО-ға қатысушы барлық ел – Кимберлий процесінің мүшесі.