Камалжан Талғатұлы Надыров «Астана медицина университеті» КЕАҚ ректоры болып тағайындалды
Камалжан Талғатұлы Надыров «Астана медицина университеті» КЕАҚ басқарма төрағасы – ректоры болып тағайындалды.
Астана медицина университеті елордада орналасқан еліміздегі ең ірі және қарқынды дамып келе жатқан медициналық жоғары оқу орындарының бірі. Ол білім беру қызметтерін көрсетуде де, медицина ғылымы мен клиникалық қызметті дамытуда да жоғары медициналық білім беру саласында жоғары беделге, өзіндік дәстүрге ие.
Камалжан Надыров 1983 жылы Алматы қаласында дүниеге келген. С.Д. Асфендияров атындағы Қазақ мемлекеттік медицина университетінің түлегі. Сондай-ақ «Тұран» университетінде, Қоғамдық денсаулық сақтау жоғары мектебінде білім алған. Түрлі жылдарда Duke University, The Fuqua School of Business (США), Parkway College (Сингапур), Florence Nightingale клиникалар тобында (Турция), Oxford Social Health Insurance system (Германия) сияқты ұйымдарда білім алған. Ол қоғамдық денсаулық сақтау саласында MBA және іскерлік әкімшілендіру бойынша Executive MBA дәрежесіне ие.
2007-2014 жылдары – Б.У. Джарбусынов атындағы Урология ғылыми орталығында клиникалық ординатор, бөлім меңгерушісі, бас директордың орынбасары болып жұмыс істеді.
Денсаулық сақтау министрлігінің құрылымында 2014 жылдан бері жұмыс істейді. Медициналық қызметті стандарттау департаменті директорының орынбасары қызметін атқарды.
2016 жылдан 2017 жылға дейін – Республикалық диагностикалық орталықты басқарды – University Medical Center филиалының директоры.
2017-2018 жылдары – Астана қаласы Денсаулық сақтау басқармасының басшысы.
2018 жылғы наурыздан 2019 жылғы наурызға дейін – Астана қаласы Қоғамдық денсаулық сақтау басқармасының басшысы.
2019-2020 жылдары – Қазақстан Республикасының Денсаулық сақтау вице-министрі.
2020 жылдың маусым-қазан айлары аралығында – Алматы қаласы Қоғамдық денсаулық сақтау басқармасының басшысы.
2020 жылдан бастап – Салидат Қайырбекова атындағы Ұлттық денсаулық сақтауды дамыту ғылыми орталығының басшысы болып жұмыс істеді.
Марапаттары мен медальдары: «Ерен еңбегі үшін» медалі, «Қазақстан халқының бірлігі» медалі, «Денсаулық сақтау ісіне қосқан үлесі үшін» төс белгісі, «Денсаулық сақтау ісінің үздігі» белгісі.
«АстМУ» КЕАҚ баспасөз қызметі: +7 777 144 54 03 Елес Муратбек