7 қаңтар 2020
Қасым-Жомарт Тоқаев Шығыс Қазақстан облысының әкімін қабылдады
Кездесу барысында Даниал Ахметов Президент Қасым-Жомарт Тоқаевқа облыстың 2019 жылғы әлеуметтік-экономикалық даму қорытындылары туралы, сондай-ақ аймақтың әлеуетін одан әрі нығайту жоспарлары туралы баяндады.
Шығыс Қазақстан облысы әкімінің айтуынша, облыста негізгі капиталға салынған инвестициялар көрсеткіштері артты, өнеркәсіп пен ауылшаруашылық өндіріс көлемінің өсуі байқалады.
Облыс әкімі Президентке атаулы әлеуметтік көмек берудің жаңа форматын іске асыру барысы жайында мәлімет берді. Қасым-Жомарт Тоқаев облыста тұратын әрбір аз қамтылған отбасының жағдайына мұқият талдау жасап, оларға көмек көрсету жөнінде тиісті шаралар қабылдауды тапсырды. Көп балалы отбасыларға қатысты да осындай тапсырма берілді.
Сонымен қатар Даниал Ахметов Мемлекет басшысына осы жылдың екінші жартыжылдығында Бұқтырма су қоймасы арқылы өтетін көпірдің құрылысы басталатынын хабарлады. Президент бұл нысанның әлеуметтік тұрғыдан аса маңызды екенін атап өтіп, көпір құрылысы аймақ халқының едәуір бөлігін жол тауқыметінен арылтатынын айтты.
Қасым-Жомарт Тоқаев Даниал Ахметовке Абайдың 175 жылдығын өткізуге, соның ішінде, Жидебайдағы мұражай мен қонақ үй кешенінің құрылысына қатысты бірқатар нақты тапсырма берді.
Мемлекет басшысы әкімнің өңірді әлеуметтік-экономикалық дамыту жөніндегі жұмысына оң баға беріп, Шығыс Қазақстан облысының ғылым-білім және медициналық әлеуетін арттыруға бағытталған бастамаларын атап өтті.