Қасым-Жомарт Тоқаев Түркістан облысы мен Шымкент қаласының әкімдерін қабылдады
2024 жылдың 16 қаңтары
Президентке өткен жылдың қорытындысы бойынша Түркістан облысында негізгі макроэкономикалық көрсеткіштер бойынша оң динамика байқалғаны айтылды. Атап айтқанда, облыстағы өнеркәсіп өнімінің көлемі 2,5 пайызға артып, 1 триллион теңгеден асты. Өңдеу өнеркәсібін дамыту мақсатында 594 жаңа жұмыс орнын құрумен жалпы сомасы 30,2 млрд теңгені құрайтын 20 жоспарланған жоба іске қосылды.
Дархан Сатыбалды алдағы бес жылда облыстың меншікті кірісін 100 миллиард теңгеге арттыру жоспарланып отырғанын айтты. Саланы әртараптандыру нәтижесінде рекордтық өнім – 3,3 млн тонна көкөніс және бақша өнімдері жиналды. Мемлекет басшысының тапсырмасына сәйкес өнімділікті арттыру және суды үнемдеу үшін ауыл шаруашылығына жаңа тәсілдер мен су үнемдеу технологиялары енгізілуде.
Қасым-Жомарт Тоқаевқа өңірдегі шағын және орта бизнестің дамуы туралы баяндалды. Дархан Сатыбалдының айтуынша, кәсіпкерлік субъектілерінің саны 211 мыңға жетіп, 1,6 триллион теңгенің өнімі өндірілген. Құрылыс жұмыстарының көлемі 407,5 млрд теңгені құрап, 898,9 мың шаршы метр тұрғын үй пайдалануға берілді. Үш мыңға жуық отбасы жаңа пәтерлерге ие болды. Сонымен қатар, өткен жылы бюджет қаражатына 35 мектеп салынып, оның 20-сы пайдалануға берілді. «Жайлы мектеп» жобасы аясында үш жыл ішінде облыста 49 мың оқушыға есептелген 63 мектеп салынады.
Сондай-ақ Мемлекет басшысына облыстағы ауылдарды су және газбен қамту бойынша жүргізіліп жатқан жұмыстар туралы ақпарат берілді. Өткен жылы облыстағы 20 елді мекенге жаңа су құбырлары тартылып, тоғыз ауылдың тозығы жеткен жүйелері жаңартылды. Сондай-ақ 62 газ нысанының құрылысы аяқталып, 48 елді мекен газға қосылды.
Мемлекет басшысына Шымкент қаласының 2023 жылға арналған әлеуметтік-экономикалық дамуы туралы есеп ұсынылды.
Мемлекет басшысы хабарлағандай, өткен жылдың соңында негізгі капиталға құйылған инвестиция көлемі 26 пайызға өсіп, 724,3 миллиард теңгені құрады. 1 триллион теңгеден астам өнеркәсіп өнімі өндірілді. Құрылыс саласы қарқынды дамып келеді, 1 миллион шаршы метрден астам тұрғын үй пайдалануға берілді.
Әкімнің айтуынша, қалада өнеркәсіп саласын дамыту мақсатында жалпы ауданы 867 гектарды құрайтын бес өндірістік аймаққа инфрақұрылым тарту жұмыстары басталып, инвестициялық жобалар пулы жасақталған.
Қазір қалада 128 мыңнан астам шағын және орта бизнес субъектілері жұмыс істейді. Бұл 2022 жылмен салыстырғанда 16,4 пайызға артық. Кәсіпкерлікті дамыту мақсатында жалпы сомасы 19,8 млрд теңгеге 3 498 жобаға қолдау көрсетілді.
Сондай-ақ Мемлекет басшысына Шымкент қаласының инфрақұрылымын жаңғырту жұмыстарының барысы туралы баяндалды. Атап айтқанда, жаңа әуежай терминалын салу және теміржол вокзалын қайта жаңғырту жұмыстары жүргізілуде. Қалада «Ізетті Зейнеткер» сауықтыру орталығы, Конгресс-холл, Үстел теннисі кешені, жаңа ипподром сияқты нысандар бой көтерді. Өткен жылы Оқушылар сарайы, Балаларға арналған шығармашылық орталығы және үш мектептің қосымша құрылыстары да пайдалануға берілді. «Жайлы мектеп» ұлттық жобасы аясында 28 мың орындық 18 білім беру мекемесінің құрылысы басталды.
Президентке мемлекет меншігіне қайтарылған нысандар туралы да ақпарат берілді. Атап айтқанда, жылдар бойы қараусыз қалған бұрынғы Фосфор сарайы қала балансына қайтарылып, мемлекет меншігіне өтіп, демеушілер есебінен «Спутник» алаңы қайта жаңғыртылды.Кездесу соңында Қасым-Жомарт Тоқаев қала экономикасын одан әрі әртараптандыру, қосымша инвестиция тарту, сондай-ақ шағын және орта бизнесті қолдау шараларын күшейту бойынша нақты тапсырмалар берді.