«Мәңгілік ел» үгіт пойызы 5000 ақтөбелікке кеңес берді
Қазақстан Республикасы Тәуелсіздігінің 25 жылдығына орай ұйымдастырылған республикалық акция аясында жолға шыққан «Мәңгілік ел» пойызы Ақтөбе облысына келді. Оның аймақтағы жұмыс қорытындысы туралы «Ақтөбе Ақпарат» орталығында өткен брифингте айтылды.
15 ақпанда Астана қаласынан жолға шыққан «Мәңгілік ел» пойызы Елбасының бейбітшілік және келісім саясаты айналасында халық бірлігін нығайту және қоғамды біріктіру мақсатында еліміздің барлық өңірлерін аралайды.
Пойыз құрамында Қазақстан Халқы Ассамблеясы, мемлекеттік органдар мен ұйымдар, «Атамекен» Ұлттық кәсіпкерлер палатасының өкілдері, әлеуметтік қызметкерлер, дәрігерлер, т.б. бар.
1 наурызда үгіт пайызы Ақтөбе облысының Әйтеке би ауданына аялдап, әртүрлі бағыттағы біліктілігі жоғары мамандар дәрігерлер тұрғындарға әлеуметтік, медицина, құқықтық және кәсіпкерлік мәселелері бойынша кеңестер берді.
Пойыз жетекшісі Әміржан Әлпейісовтің айтуына қарағанда, Әйтеке би ауданында 3000 адамға қызмет көрсетілді.
Ертеңіне «Мәңгілік ел» пойызы Ақтөбе қаласына келді. Мұнда төрт қалалық емханада Денсаулық сақтау және әлеуметтік даму министрлігінің өкілдері тұрғындарға дәрігерлік көмек көрсетті. «Жұмыспен қамту жол картасы – 2020» мемлекеттік бағдарламасына қатысу жөнінде түсініктеме берілді, зейнетақы, әлеуметтік қамсыздандыру, жұмысшылардың еңбек құқықтарын қорғау, мүмкіндігі шектеулі азаматтарды қоғамға бейімдеу, т.б. бойынша кеңестер берілді.
«Атамекен» ҚР ҰКП өкілдері бастауыш және қызмет етіп жатқан кәсіпкерлерге шағын және орта бизнесті, ауыл шаруашылығын мемлекеттік қолдау бағдарламалары бойынша түсіндіру жұмыстарын жүргізді. Жалпы алғанда, екі мыңның үстінде ақтөбелік кеңес алды.
Акция асында түрлі мәдени-бұқаралық шаралар, дөңгелек үстелдер мен конференциялар, таныстырылым, фото-кітап көрмелері мен кездесулер ұйымдастырылды.
«Ақтөбе Ақпарат» орталығы