Еңбекмині жанындағы «Адалдық алаңы» жобалық кеңсесінің жаңа басшысы тағайындалды
ҚР Еңбек және халықты әлеуметтік қорғау министрі Серік Шәпкеновтің бұйрығымен ҚР Еңбекмині жанындағы «Адалдық алаңы» жобалық кеңсесінің басшысы болып Захира Бегалиева тағайындалды.
Захира Бегалиева «ITeachMe» құзыреттерді дамыту орталығы» қоғамдық қорының төрайымы, ҚР Білім және ғылым министрінің ерекше білім берілуіне қажеттілігі бар адамдарды оқыту мәселелері жөніндегі штаттан тыс кеңесшісі, сондай-ақ мүгедектігі бар адамдарды әлеуметтік қорғау саласындағы үйлестіру кеңесінің мүшесі болып табылады.
ҚР Еңбек және халықты әлеуметтік қорғау министрлігі «Адалдық алаңы» жобалық кеңсесінің бұрынғы басшысы Әмір Сүлейменовке атқарған жұмысы үшін алғыс білдіреді.
Естеріңізге сала кетейік, «Еңбек және халықты әлеуметтік қорғау – Адалдық алаңы» жобалық кеңсесі Мемлекет басшысының 2018 жылғы 5 қазандағы «Қазақстандықтардың әл-ауқатының өсуі: табыс пен тұрмыс сапасын арттыру» атты Қазақстан халқына Жолдауын іске асыру жөніндегі жалпыұлттық іс-шаралар жоспарының 87-тармағын орындау мақсатында құрылған болатын.
Жобалық кеңсенің негізгі міндеті сыбайлас жемқорлық тәуекелдерін азайту, сыбайлас жемқорлықты жалпыға бірдей қабылдамауды қалыптастыру, азаматтардың ҚР Еңбек және халықты әлеуметтік қорғау министрлігіне және ведомстволық бағынысты ұйымдарға сенімін арттыру болып табылады.