Ы.Алтынсарин атындағы Арқалық педагогикалық институтында Erasmus+ бағдарламасының Қазақстандағы Ұлттық кеңсесінің үйлестірушісі Лаура Палуановамен консультативтік кездесу өтті.

Кеңсенің бастамасымен ұйымдастырылған шараның мақсаты – тәжірибе алмасу және мүдделі тараптарды ақпараттандыру, сондай-ақ Erasmus+ жобасының нәтижелерін танымал ету болды.

Іс-шара барысында институттың профессорлық-оқытушылық құрамымен және қызметкерлерімен ақпараттық сессия өткізілді. Онда спикер халықаралық Erasmus+ бағдарламасы туралы және жобалар бойынша түсіндірме жұмыстарын жүргізді. Сондай-ақ, қол жеткізілген нәтижелер көрсетілді және жобаларды іске асырудың одан әрі перспективалары, ұтқырлықты ұйымдастыру жолдары талқыланды. Іс-шараның екінші бөлімі әлеуетті бағдарламаға қатысушыларға арналған өтінім формасын талдауға арналды.

Кездесу барысында қонақ институт басшылығымен кездесіп, тараптар екіжақты ынтымақтастықтың кең ауқымды мәселелері бойынша пікір алмасты. Ректор Ержан Әмірбекұлы институттың оқу-тәрбие мен ғылыми-зерттеу жұмыстарымен таныстырып, факультеттер, зертханалар мен институт мүмкіндіктеріне тоқталды.

Кездесу соңында Лаура Палуанова жылы қабылдау үшін институт басшылығына алғыс айта отырып, болашақта институттың ғылыми және академиялық құрылымдары халықаралық Erasmus+ жобаларына қатысушылар қатарында болатынына сенім білдірді. Өз кезегінде ректор қонаққа Арқалық өңіріне келгені және ынтымақтастыққа қызығушылық танытқаны үшін алғысын білдірді.

Айта кету керек, «Erasmus+» Еуропалық Одақтың білім беру бағдарламасы, ол әлемнің әр түкпірінен келген студенттер мен оқытушыларға арналған бірнеше бағытты қамтиды және Еуропада қысқа мерзімді немесе ұзақ мерзімді білім беру қызметі үшін стипендия алуға мүмкіндік береді.