ПРЕЗИДЕНТІҢ АПТАСЫ 29/11

Қазақстан мен Швейцария президенттері Берн тарихи музейінің Анри Мозер топтамасындағы XIX ғасырдың қолөнер туындыларын тамашалады

2021 жылғы 30 қараша

Швейцария, Женева қаласы

Келіссөздер аяқталған соң Қазақстан Президенті Қасым-Жомарт Тоқаев пен Швейцария Президенті Ги Пармелан белгілі дипломат және саяхатшы Анри Мозердің бірегей экспонаттар топтамасындағы керемет жәдігерлердің бірі – қазақтың барқыттан жасалған тұскілемін бірге тамашалады.

Аталған жәдігерді қазақ сұлтаны Баймұхаммед XIX ғасырда швейцариялық дипломатқа тарту еткен. Тәуелсіздігіміздің 30 жылдығында аталған жәдігер екі ел арасындағы мәдени байланыстардың ерекше символына айналды.

Анри Мозердің топтамасында тұскілемдер, ұлттық қарудың түрлері: айбалталар, қылыштар, қанжарлар, сондай-ақ ат әбзелдері және басқа да бұйымдар бар. Қазақ даласының билеушілері аталған жәдігерлерді зерттеушіге сыйлық ретінде берген және олар Швейцарияға жеткізілген.

Экспонаттардың ішінде тұскілемдердің алатын орны ерекше. Олар қазақ халқының көркем туындысы ғана емес, сонымен қатар Қазақ хандығының тарихын ғылыми тұрғыда зерттеу үшін құнды материал болып табылады.

Мемлекет басшысы тұскілемнің бірегейлігін және оның тарихи құндылығын атап өтіп, аталған өнер туындысының Қазақстанда да көрмеге қойылатынына үміттенетінін айтты.

 

Мемлекет басшысы Швейцарияның Президентімен келіссөз жүргізді

2021 жылғы 30 қараша

Швейцария, Женева қаласы

Женева қаласындағы Әулие Петрдің Кафедралды соборының алдында өткен ресми кездесуден кейін екі елдің басшылары келіссөз жүргізді.

Қасым-Жомарт Тоқаев пен Ги Пармелан бір-біріне ресми делегациялардың мүшелерін таныстырды. Содан кейін екі елдің әнұрандары шырқалды. Президенттер Швейцарияның туына құрмет көрсетіп, Құрмет қарауылын бойлай өтті.

Салтанатты рәсімнен кейін мемлекеттер басшылары шағын және кеңейтілген құрамда кездесулер өткізді.

Өзара сенім жағдайында өткен кездесуде мемлекеттер басшылары Қазақстан мен Швейцария арасындағы саяси, сауда-экономикалық, инвестициялық, қаржы салаларындағы көпжоспарлы ынтымақтастықтың ахуалы мен перспективаларын жан-жақты талқылады.

Бұдан бөлек екі ел басшылары Бреттон-Вуд институттары, халықаралық ұйымдар аясындағы өзара ықпалдастықты қарастырып, аймақтық күн тәртібіндегі мәселелерді, оның ішінде Ауғанстандағы жағдай мен осы елге гуманитарлық көмек көрсету мәселесін сөз етті.

Сонымен қатар пандемияға және климаттың өзгеруіне қарсы күреске, Орталық Азиядағы су дипломатиясына қатысты өзекті мәселелер жөнінде пікір алмасты. Қасым-Жомарт Тоқаев пен Ги Пармелан саяси және экономикалық байланыстардың оң қарқынын атап өтіп, екіжақты байланыстардың барлық бағыты бойынша өзара тиімді ынтымақтастықты одан әрі дамытуға мүдделі екендерін білдірді. Мемлекет басшысы Швейцариямен жан-жақты қатынастарды дамытуға баса мән беретінін және осы елді Қазақстанның Еуропадағы маңызды саяси әрі экономикалық әріптесі санайтынын айтты.

Сонымен қатар Қасым-Жомарт Тоқаев Ги Пармеланға Қазақстанда жүргізіліп жатқан ауқымды саяси және экономикалық реформалар жөнінде айтты. Екі ел басшылары ауыл шаруашылығы, көлік және логистика, машина жасау, фармацевтикалық өнеркәсіп және «жасыл» жобалар саларындағы бірлескен жұмыстарды атқару үшін мемлекеттеріміздің әлеуеті зор екенін айтты.

Келіссөз қорытындысы бойынша мемлекеттер басшыларының қатысуымен бірқатар үкіметаралық және коммерциялық келісімге қол қойылды.

  1. Қазақстан Республикасының Үкіметі мен Швейцария Конфедерациясы Федералдық Кеңесі арасындағы бағалы металдардан жасалған бұйымдардағы сынамалық таңбаны өзара мойындау жөніндегі келісім;
  1. 1994 жылғы 12 мамырда Алматы қаласында Қазақстан Республикасының Үкіметі мен Швейцария Федералдық Кеңесі арасында қол қойылған сауда-экономикалық ынтымақтастық жөніндегі келісім хаттамасы (Сауда қызметтерін ішкі реттеу қағидалары);
  1. «Қазақстан темір жолы» ҰК» АҚ мен «Stadler CIS AG» компаниясы арасындағы стратегиялық ынтымақтастық жөніндегі келісім.

Мемлекет басшысы Инвестициялық дөңгелек үстел отырысына қатысты

2021 жылғы 29 қараша
Швейцария, Женева қаласы
Қасым-Жомарт Тоқаев өз сөзінде бүгінгі іс-шараның Қазақстан мен Швейцария арасындағы сауда-экономикалық қатынастарды дамытуда маңызы зор екенін атап өтті. Оның айтуынша, Швейцария конфедерациясы ұзақ жылдан бері Қазақстанның негізгі стратегиялық және инвестициялық серіктесі саналады.– Соңғы 15 жылда еліміздің экономикасына салынған Швейцария капиталы 26 миллиард швейцар франкіне жетті. Ал Швейцарияға құйылған қазақстандық инвестицияның көлемі 775,2 миллион швейцар франкін құрады. 200-ден астам швейцариялық  кәсіпорын Қазақстанға инвестиция салып, табысты жұмыс істеп жатыр. Олардың қатарында Glencore, Sika, Swiss Grow, Stadler және басқа да жаһандық деңгейдегі ірі компаниялар бар. Бұл біз үшін, яғни Қазақстанға және біздің инвестиция тарту тәсілімізге деген үлкен сенімнің белгісі. Бұл бағытта қажырлы еңбек етіп келеміз. Биылғы маусым айында біздің нарықта жұмыс істейтін швейцариялық компаниялармен арнайы кездесу өткіздім. Сіздердің бәріңізбен тұрақты әрі берік ынтымақтастық орнатуға ниеттіміз, – деді Президент.Мемлекет басшысы Қазақстан Орталық Азия бойынша экономикасы жылдам дамып келе жатқан елдердің бірі екенін атап өтті. Тәуелсіздіктің  30 жылы ішінде 370 миллиард доллардан астам тікелей шетел инвестициясы тартылды. Әлемнің 180 елімен сауда-саттық жасалады.– Экономикамыз нығайды және мейлінше бәсекеге қабілетті әрі тартымды болды. Бүгінде біз экономиканың таза, инновациялық және әртараптандырылған моделіне бет бұрдық. Осыған орай нақты шаралар қабылдап жатырмыз. Соның аясында инвесторларға кешенді қолдау көрсету  ұлттық басымдықтарымыздың бірі ретінде белгіленді. Біз жобаның басынан аяғына дейін әрбір инвесторға жеке қолдау көрсету қағидатын енгіздік. Мемлекет аса маңызды инвестициялық жобаларға 25 жылға дейін заңнамалық және қаржылық тұрақтылықты сақтауға кепілдік береді, – деді Қасым-Жомарт Тоқаев.Президент Шетелдік инвесторлар кеңесін өзі басқаратынын және Премьер-Министрдің жетекшілігімен инвестициялық омбудсмен жұмыс істейтінін жеткізді.– Қазақстанда қызметі ағылшын құқығы базасына негізделген тәуелсіз соты бар әрі Орталық Азия аймағы бойынша жалғыз «Астана» халықаралық қаржы орталығы жұмыс істейді. АХҚО құрылымында сот ісін қараудың жедел баламалы түрін қамтамасыз ететін Халықаралық арбитраж орталығы құрылған. Қаржылық қызмет көрсететін Орталықтың қатысушылары 2066 жылға дейін корпоративті табыс салығы мен қосымша құн салығынан босатылған. Шетел валютасына, визалар мен жұмыс күшіне қатысты талаптар оңтайландырылған. Біздің биржалық алаңымызда әлемнің 59 елінен 1000-нан астам компания бар, – деді Мемлекет басшысы.

Қазақстан Президенті швейцариялық инвесторларға елімізде экономиканың басым бағыттары бойынша 37 арнаулы экономикалық және индустриялық аймақтың құрылғанын айтты.

Соңғы жылдары Қазақстан күшті көлік-логистикалық база құрды және еліміздің жаһандық көлік дәлізіне қосылуын қамтамасыз етті. Еліміздің аумағы арқылы Қытай, Орталық Азия, ТМД елдері, Парсы шығанағы мен Еуропа арасын жалғайтын ондаған халықаралық көлік жолы өтеді.

– Егер конструктивті диалог орнаса және оған бизнес қосылатын болса, елдеріміз арасындағы қатынастар табысты болады деп санауға негіз бар. Бұған отыз жыл ішінде көз жеткіздік. Үкімет осындай ықпалдастық пен ынтымақтастықтың негізін қалай алады және солай жасауға тиіс. Бұған дипломатиялық және саяси құралдар, реттеу тетіктері, ынталандырулар, құқық үстемдігі қағидатын іске асыру және нақты қолдау шаралары арқылы қол жеткізуге болады. Қалған істің бәрін бизнес жасай алады және істеуге тиіс, – деді Қасым-Жомарт Тоқаев.

Инвестициялық дөңгелек үстел отырысы барысында Economisuisse Сыртқы экономикалық байланыстар жөніндегі швейцариялық кәсіпорындар ассоциациясының вице-президенті Ян Аттесландер, Қазақстан-Швейцария іскерлік кеңесінің тең төрағалары:  Stadler Rail AG компаниясының бас атқарушы директоры Петер Шпулер, «Қазақстан темір жолы» ҰК» акционерлік қоғамының басқарма төрағасы Нұрлан Сауранбаев, ABB Switzerland компаниясының бас директоры Роберт Ичнер,  Ammann Group компаниясының бас атқарушы директоры Ханс-Кристиан Шнайдер, KS Genetics компаниясының президенті Филиппо Ломбарди, Glencore жаһандық мыс-мырыш департаментінің басшысы Никола Попович, Inoks Capital компаниясының бас атқарушы директоры Набиль Абдул-Массих, Basel Euro Airport компаниясының даму жөніндегі директоры Михаэль Швин, m-3 Groupe компаниясының негізін қалаушы әрі президенті Абдалла Шатила, Polymetrix AG компаниясының бас атқарушы директоры Мартин Мюллер, Clariant жаһандық әрі маңызды тұтынушылармен жұмыс жөніндегі басқарушы директоры Йарле Шолд сөз сөйледі.

Швейцариялық кәсіпкерлердің сөзін тыңдаған Мемлекет басшысы Қазақстан экономикасын дамытуға қосқан үлесі үшін оларға алғыс айтты және екі елдің іскерлік топтарының өзара жемісті әрі тиімді ынтымақтастығы нығая түсетініне үміттенетінін жеткізді.

Сонымен қатар Қасым-Жомарт Тоқаев Stadler компаниясының «Қазақстан Темір Жолы» ұлттық компаниясының стратегиялық серіктесі екенін айтты. Президенттің пікірінше, бұл шешім Қазақстан мен Швейцарияның өзара іс-қимылына іс жүзіндегі қосымша серпін береді.

Жиынға «Roche Holding», «Philip Morris International», «Caviar House & Prunier», «Swiss Choice Holding», «Bühler AG», «Economisuisse», «Swissgrow» және басқа да компаниялардың басшылары қатысты.

Инвестициялық дөңгелек үстел отырысының қорытындысы бойынша сомасы 301 миллион доллар болатын алты коммерциялық келісімге және он коммерциялық емес құжатқа қол қойылды:

1. «Kazakh Invest» ҰК» акционерлік қоғамы мен Eurasia Group Ag компаниясының арасында құны 50 миллион доллар болатын Eurasia Group компаниясының 10 сервис орталығын салу жөніндегі өзара түсіністік туралы меморандум;

2. «Самұрық-Қазына Инвест» ЖШС мен Inoks Capital компаниясы арасында сомасы 50 миллион доллар болатын аграрлық қор құру жөніндегі келісім;

3. Қазақстан Республикасы Денсаулық сақтау министрлігі мен «Roche Holding» компаниясы арасындағы Әлеуметтік маңызы бар ауруларды емдеу бойынша сомасы 50 миллион доллар болатын Инновациялық дәрілік препараттарды локализациялау жөніндегі шекті келісім;

4. Алматы облысында құны 50 миллион доллар болатын мал шаруашылығы кешенін құру жобасы жөніндегі келісім;

5. «СП Taraz Pet» ЖШС мен швейцариялық Polymetrix AG компаниясы арасындағы «Рециклирленген полиэтилентерефталат (R-PET) өндіру жөніндегі зауыттың құрылысына» қатысты құны 1 миллион доллар болатын жоба бойынша технологияларды беру туралы лицензиялық келісім;

6. «Қазақстан темір жолы» ҰК» акционерлік қоғамы  мен Stadler CIS AG компаниясы арасындағы құны 100 миллион доллар болатын стратегиялық ынтымақтастық туралы келісім.

Қазақстан Президенті ДДСҰ-ның Дүниежүзілік денсаулық сақтау ассамблеясының арнаулы сессиясына қатысты

2021 жылғы 29 қараша

Швейцария, Женева қаласыМемлекет басшысы Дүниежүзілік денсаулық сақтау ассамблеясы арнаулы сессиясының қатысушыларына ілтипат білдіріп, COVID-19 пандемиясына қарсы күрестің аса маңызды екенін атап өтті. Арнаулы сессия ДДСҰ тарихында екінші рет өткізіліп отыр. Бұл аталған проблеманың өзектілігін көрсетеді.

– ДДСҰ қоғамдық денсаулық сақтау жолындағы осы аса күрделі жаһандық күресте жетекші рөл атқарды. Ұйымға мүше мемлекеттердің денсаулық сақтау жүйесі ауыр жағдайды бастан өткерді және қиындық әлі де жалғасып жатыр. Коронавирустың жаңа әрі қауіпті штаммдары әлем бойынша тез тарала бастағандықтан, алдағы апталарда COVID-19 індетін жұқтырғандар саны айтарлықтай өседі. Жуырда Оңтүстік Африка ғалымдары анықтаған «Омикрон» штаммы жаңа қауіп төндіріп отыр, – деді Қасым-Жомарт Тоқаев.

Президенттің айтуынша, пандемия халықаралық қатынастарда көптеген кемшілікті анықтаған. Сондай-ақ дағдарыстың әлеуметтік-экономикалық салдары барлық деңгейдегі әлеуметтік құрылымдарды жан-жақты қайта зерделеуге мәжбүрледі. Пандемия ынтымақтастыққа және биологиялық сын-қатерлерге қарсы іс-қимылдардың мейлінше тиімді жүйесіне негізделген жаңа жаһандық әдіс керек екенін көрсетті.

– Ең алдымен, індет алдында бізді дәрменсіз қылған кемшіліктерімізді жою қажет. Сондықтан біз осы Арнаулы сессияға бір ғана мақсатпен, яғни ДДСҰ конвенциясын әзірлеу қажеттігі мен оның тетіктерін немесе пандемияға және оған төтеп беруге дайындықты қамтамасыз ету жөніндегі халықаралық құжатты қарастыру үшін жиналып отырмыз. Дайындық жұмыстары мен баяндамалары үшін Дүниежүзілік денсаулық сақтау ассамблеясының 74-отырысының жұмыс тобына алғыс айтуға рұқсат етіңіздер. Қазақстан пандемияға дайындықты арттыруға және тиісті шараларды қабылдауға бағытталған ДДСҰ конвенциясына жолданған ұсыныстарды қолдайды, – деді Мемлекет басшысы.

Қасым-Жомарт Тоқаев Қазақстанның ДДСҰ-ны толық қолдайтынын атап өтіп, бұл ұйымды сенімді әріптес ретінде қарастыратынын айтты. Мемлекет басшысы әлемдік қауымдастықтың коронавирусқа қарсы күресіне Ұйымның Бас директорының қосқан жеке үлесін жоғары бағалады.

– Қазіргі пандемия денсаулық сақтау саласындағы ерекше төтенше жағдай болып саналмайды. Дағдарыс мемлекеттердің және ұлттық денсаулық сақтау жүйелерінің ішкі құрылымдық кемшіліктерін көрсетіп қана қоймай, жаһандық деңгейдегі күрделі әрі қордаланған теңсіздіктерді айқындап берді. Сондықтан Қазақстан вакциналардың әлем бойынша әділ таратылуын қолдайды және оған белсенді түрде атсалысады. Біз 2022 жылдың ортасына қарай жаһандық вакциналауды қамтамасыз ету жөніндегі ДДСҰ-ның COVID-19 індетіне қарсы стратегиясын толық қолдаймыз, – деді Президент.

Мемлекет басшысы жиын қатысушыларына QazVac вакцинасының әзірленуі және оның жаңа «Дельта» штаммына қарсы сәтті модификацияланғаны жөнінде айтты. Қазақстандық вакцина өзінің тиімділігін елімізде ғана емес, Орталық Азияның басқа да мемлекеттерінде дәлелдеді.

– Кез келген ауыл немесе қаладағы сияқты жаһандық деңгейдегі біздің өркендеуіміз, игілігіміз денсаулық жағдайымызға  байланысты. Ал біздің денсаулығымыз ынтымақтастыққа және ортақ сын-қатерге үйлесімді төтеп беруге байланысты. Мен барлық елді көзделген мақсатқа қол жеткізу үшін Дүниежүзілік денсаулық сақтау ұйымы аясына бірігуге шақырамын, – деді Қасым-Жомарт Тоқаев.