ЕЛБАСЫНЫН АПТАСЫ

6 желтоқсан 2018
Қазақстан Президенті ТМД елдері басшыларының бейресми саммитіне қатысты
Ресей Федерациясы, Санкт-Петербург қаласы
Кездесуге Əзербайжан Республикасының Президенті  И.Əлиев, Беларусь Республикасының Президенті А.Лукашенко, Қырғыз Республикасының Президенті С.Жээнбеков, Молдова Республикасының Президенті И.Додон, Ресей Федерациясының Президенті В.Путин, Тəжікстан Республикасының Президенті Э.Рахмон, Түрікменстан Президенті Г.Бердімұхамедов, Өзбекстан Республикасының Президенті Ш.Мирзиёев, Армения Республикасы Премьер-Министрінің міндетін атқарушы Н.Пашинян қатысты.

Мемлекеттер басшылары кездесу барысында түрлі салалардағы өзара тиімді ынтымақтастықты нығайту жəне оны əрі қарай дамыту мəселелері жөнінде пікір алмасты.

6 желтоқсан 2018
Мемлекет басшысы Ресей Федерациясына жұмыс сапарымен барды
Санкт-Петербург қаласы, Ресей Федерациясы
Нұрсұлтан Назарбаев Жоғары Еуразия экономикалық кеңесінің отырысына және ТМД мемлекеттері басшыларының бейресми саммитіне қатысу үшін Санкт-Петербург қаласына келді.
4 желтоқсан 2018
Мемлекет басшысының төрағалығымен Қауіпсіздік кеңесінің отырысы өтті
Жиын барысында сыртқы факторлардың ұлттық қауіпсіздік ахуалына әсері және қорғаныс саласындағы мемлекеттік саясаттың іске асырылуы жөніндегі мәселелер қаралды.

– Қазақстанға әсер ететін сыртқы факторлардың бар екенін бәріміз білеміз. Солардың ішінде Ресей мен АҚШ арасындағы санкциялық текетірес, Қытай мен АҚШ арасындағы сауда шиеленісі, Сириядағы ахуал және басқа да жағдайлар бар. Осыған байланысты бізге мәселелерді талқылап, тиісті шаралар қабылдау қажет, – деді Қазақстан Президенті.

Күн тәртібіндегі екінші мәселені талқылау барысында Қорғаныс министрі Н.Ермекбаев Қарулы Күштердің биылғы оқу жылындағы әскери дайындығының және өткізілген оқу-жаттығулардың негізгі қорытындылары, сондай-ақ әскердің жауынгерлік дайындығын арттыру жөнінде қабылданып жатқан шаралардың нәтижелері туралы баяндама жасады.

Сонымен қатар, жиын барысында қорғаныс өнеркәсібі кәсіпорындарын жаңғырту және қорғаныс өнімдерінің жаңа түрлерінің өндірісін игеру жөніндегі ұсыныстар қарастырылды.

Басқосу қорытындысы бойынша Нұрсұлтан Назарбаев бірқатар нақты тапсырма берді.